ម៉ូស្គូ៖ ប្រធានាធិបតីរុស្ស៊ីលោក វ្ល៉ាឌីមៀ ពូទីន បានទៅទស្សនាទីក្រុង Mariupol របស់អ៊ុយក្រែន ដែលកាន់កាប់ដោយរុស្ស៊ី ប៉ុន្មានថ្ងៃបន្ទាប់ពីតុលាការឧក្រិដ្ឋកម្មអន្តរជាតិបានចេញដីកាចាប់ខ្លួនរូបលោក ពីបទឧក្រិដ្ឋកម្មសង្រ្គាម។
ប្រធានាធិបតីរុស្ស៊ីរូបនេះ បានមកដល់តាមឧទ្ធម្ភាគចក្រ ហើយបានបើកឡានជុំវិញស្រុកជាច្រើននៃទីក្រុង ដោយឈប់ និងនិយាយទៅកាន់អ្នកស្រុកថែមទៀតផង នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ទីក្រុងជាច្រើនក្នុងតំបន់ Donetsk ត្រូវបានកាន់កាប់ដោយកងកម្លាំងរុស្ស៊ីតាំងពីខែឧសភាឆ្នាំមុន។ ដំណើរទស្សនកិច្ចដោយគ្មានការប្រកាសនេះបានធ្វើឡើងបន្ទាប់ពីលោក ពូទីន បានទៅដល់តំបន់គ្រីមៀ កាលពីថ្ងៃសៅរ៍ដើម្បីប្រារព្ធខួបលើកទី៩ នៃការបញ្ចូលឧបទ្វីបនេះ។
តំបន់ Mariupol ដែលបានធ្លាក់ទៅរុស្ស៊ីក្នុងខែឧសភា បន្ទាប់ពីការប្រយុទ្ធគ្នាដ៏យូរបំផុត និងបង្ហូរឈាមបំផុតនៃសង្រ្គាម គឺជាជ័យជម្នះដ៏សំខាន់លើកដំបូងរបស់រុស្ស៊ី បន្ទាប់ពីបរាជ័យក្នុងការដណ្តើមយកទីក្រុងគៀវ ហើយបានផ្តោតលើភាគអាគ្នេយ៍អ៊ុយក្រែនជំនួសវិញ។
តំបន់ Mariupol នៅលើសមុទ្រ Azov ត្រូវបានខូចខាតយ៉ាងខ្លាំងបន្ទាប់ពីការប្រយុទ្ធជាច្រើនសប្តាហ៍។ អង្គការសម្រាប់សន្តិសុខ និងកិច្ចសហប្រតិបត្តិការ និងអឺរ៉ុប (OSCE) បានឲ្យដឹងថា ការទម្លាក់គ្រាប់បែករបស់រុស្ស៊ី ទៅលើមន្ទីរពេទ្យសម្ភពក្នុងទីក្រុង Mariupol គឺជាឧក្រិដ្ឋកម្មសង្គ្រាម៕
ប្រែសម្រួល ឈូក បូរ៉ា
