សេអ៊ូល៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី១៩ ខែមីនា ឆ្នាំ២០២៣ថា ប្រព័ន្ធផ្សព្វផ្សាយរដ្ឋបានផ្សព្វផ្សាយឲ្យដឹងកាលពីថ្ងៃសៅរ៍ថា យុវជនកូរ៉េខាងជើង ប្រមាណជាង៨០០.០០០នាក់ បានស្ម័គ្រចិត្តចូលរួមជាមួយកងទ័ព ដើម្បីប្រយុទ្ធប្រឆាំងនឹង “ចក្រពត្តិនិយមអាមេរិក” ដែលនេះបានកើតឡើងនៅប៉ុន្មានថ្ងៃបន្ទាប់ពីក្រុងព្យុងយ៉ាងបានបាញ់សាកល្បងមីស៊ីលផ្លោងអន្តរទ្វីបដ៏មានឥទ្ធិពលបំផុតរបស់ខ្លួន ។
បន្ទាប់ពីឆ្នាំបំបែកកំណត់ត្រានៃការសាកល្បងអាវុធ និងការគំរាមកំហែងនុយក្លេអ៊ែរកើនឡើងពីក្រុងព្យុងយ៉ាង ក្រុងសេអ៊ូល និងក្រុងវ៉ាស៊ីនតោន បានបង្កើនកិច្ចសហប្រតិបត្តិការសន្តិសុខ ហើយនៅក្នុងសប្តាហ៍នេះបានចាប់ផ្តើមសមយុទ្ធយោធារួមគ្នាដ៏ធំបំផុតរបស់ពួកគេក្នុងរយៈពេល៥ឆ្នាំមកនេះ ។
ប្រទេសកូរ៉េខាងជើង បានចាត់ទុកសមយុទ្ធទាំងអស់នេះថា ជាការហាត់សមសម្រាប់ការឈ្លានពាន ហើយបានព្រមានម្តងហើយម្តងទៀតថា ខ្លួននឹងចាត់វិធានការដ៏ “លើសលប់” សម្រាប់ជាការឆ្លើយតប ។
ទីភ្នាក់ងារសារព័ត៌មានរដ្ឋបានផ្សព្វផ្សាយថា “មន្ត្រី និងនិស្សិតលីគយុវជនជាង៨០០.០០០នាក់នៅទូទាំងប្រទេសបានស្ម័គ្រចិត្តចូលរួម និងចូលរួមជាមួយកងទ័ពប្រជាជនកូរ៉េឡើងវិញ” គិតត្រឹមតែថ្ងៃសុក្រប៉ុណ្ណោះ ៕ប្រែសម្រួលដោយ៖ ម៉ៅ បុប្ផាមករា
