WARSAW ៖ រដ្ឋមន្ត្រីក្រសួងហិរញ្ញវត្ថុ របស់ប្រទេសនេះ លោកស្រី Magdalena Rzeczkowska បានឲ្យដឹងថា ជំនួយដែលទីក្រុង Warsaw បានផ្តល់ឱ្យអ៊ុយក្រែន កាលពីឆ្នាំមុនស្មើនឹង ១ ភាគរយនៃផលិតផល ក្នុងស្រុកសរុប (GDP) របស់ប្រទេសប៉ូឡូញ។
ប្រទេសប៉ូឡូញ បានបើកព្រំដែន របស់ខ្លួនដល់ប្រជាជនអ៊ុយក្រែន រាប់លាននាក់ចាប់តាំងពីជម្លោះរុស្ស៊ី-អ៊ុយក្រែន ហើយបានណែនាំគម្រោង ជំនួយមួយចំនួន នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោកស្រី Rzeczkowska បានប្រាប់វិទ្យុ Radio Zet ឲ្យដឹងថា “ការចំណាយ នៃការជួយអ៊ុយក្រែន គឺប្រហែល ១ ភាគរយនៃផលិតផល ក្នុងស្រុកសរុបដែលស្មើនឹង ៣០ ពាន់លាន zloty ឬ(៦,៩ ពាន់លានដុល្លារ)” ។
លោកស្រីបានបន្ដថា ជំនួយនេះបានមកពីថវិកាកណ្តាល របស់ប្រទេសប៉ូឡូញ ថវិការដ្ឋាភិបាលក្នុងតំបន់ និងថវិការបស់យោធា។ យោងតាមការប៉ាន់ស្មានបឋម ដែលចេញផ្សាយដោយស្ថិតិប៉ូឡូញក្នុងខែមករា GDP ពិតប្រាកដរបស់ប្រទេសបានកើនឡើង ៤,៩ ភាគរយពីមួយឆ្នាំទៅមួយឆ្នាំក្នុងឆ្នាំ២០២២។
លោកស្រីរដ្ឋមន្ត្រី ក៏បានឲ្យដឹងផងដែរថា ពលរដ្ឋអ៊ុយក្រែនប្រហែល ៧៨ម៉ឺន នាក់កំពុងធ្វើការនៅក្នុងប្រទេសប៉ូឡូញ ហើយពួកគេមួយចំនួន បានបង្កើតអាជីវកម្មនៅក្នុងប្រទេស “ដូច្នេះតាមរបៀប ដែលពួកគេក៏កំពុងរួមចំណែកដល់កំណើនសេដ្ឋកិច្ចផងដែរ” ៕
ប្រែសម្រួល ឈូក បូរ៉ា
