មន្ទីរបញ្ចកោណ ចាប់ផ្តើមដាក់ពង្រាយឡើងវិញ យន្តហោះវាយប្រហារ A-10 ដើម្បីរារាំងរុស្ស៊ី និងចិន

បរទេស៖ កាសែត Wall Street Journal បានរាយការណ៍កាលពីថ្ងៃព្រហស្បតិ៍ថា សហរដ្ឋអាមេរិកនឹងបញ្ជូនយន្តហោះវាយប្រហារ A-10 ដែលមានអាយុរាប់ទសវត្សរ៍ទៅកាន់តំបន់មជ្ឈិមបូព៌ា ដោយជំនួសយន្តហោះទំនើបៗបន្ថែមទៀតដែលកំពុងឈរជើងក្នុងតំបន់ ដែលវាមានបំណងដាក់ពង្រាយនៅអឺរ៉ុប និងប៉ាស៊ីហ្វិក។

យោងតាមសារព័ត៌មាន RT ចេញផ្សាយនៅថ្ងៃទី២៣ ខែមីនា ឆ្នាំ២០២៣ បានឱ្យដឹងថា ការដាក់ពង្រាយឡើងវិញ ដែលត្រូវបានរំពឹងទុកធ្វើឡើងនៅក្នុងខែមេសា នឹងមានន័យថា សហរដ្ឋអាមេរិកនឹងបម្រុងទុកយន្តហោះទំនើបបន្ថែមទៀត ដើម្បីទប់ទល់នឹងការគម្រាមកំហែងដែលគេយល់ឃើញពីរុស្ស៊ី និងចិន។ យន្តហោះ A-10 ចាស់ៗត្រូវបានមន្ទីរបញ្ចកោណចាត់ទុកថាគ្រប់គ្រាន់ក្នុងការការពារផលប្រយោជន៍អាមេរិកនៅមជ្ឈិមបូព៌ា។

Wall Street Journal បានដកស្រង់សំដីរបស់ឧត្តមសេនីយ៍ទោ Larry Stutzriem ដែលចូលនិវត្តន៍របស់កងទ័ពអាកាសសហរដ្ឋអាមេរិកថា “ការចាំបាច់គឺត្រូវទទួលបានយន្តហោះដែលសមស្របបំផុតទៅកាន់មហាសមុទ្រប៉ាស៊ីហ្វិកសម្រាប់ការប្រឈមមុខនឹងការគំរាមកំហែងកាន់តែខ្ពស់” ។ សហរដ្ឋអាមេរិក និងសម្ព័ន្ធមិត្តមួយចំនួនបានសម្តែងការព្រួយបារម្ភចំពោះការពង្រីកយោធារបស់ចិននៅក្នុងតំបន់ប៉ាស៊ីហ្វិក។

វ៉ាស៊ីនតោនចាត់ទុកប្រទេសចិនថាជា “ការគម្រាមកំហែងល្បឿនលឿន” របស់ខ្លួន យោងទៅតាមឯកសារត្រួតពិនិត្យការពារជាតិដែលចេញផ្សាយដោយមន្ទីរប៉ង់តាហ្គោនកាលពីឆ្នាំមុន ដែលមានន័យយ៉ាងមានប្រសិទ្ធភាពថា សហរដ្ឋអាមេរិកមើលឃើញប្រទេសអាស៊ីជាគូប្រជែងនឹង “ផលប្រយោជន៍ និងតម្លៃ” របស់ខ្លួន , នេះបើយោងតាមរដ្ឋមន្ត្រីការពារជាតិអាមេរិក Lloyd Austin ៕ប្រែសម្រួលៈ ណៃ តុលា