បរទេស ៖ ប្រទេសកូរ៉េខាងជើង បានចែករំលែកព័ត៌មានលម្អិត អំពីការសាកល្បងអាវុធ ចុងក្រោយបំផុត ចំនួនពីររបស់ខ្លួន ដែលទាំងពីរពាក់ព័ន្ធនឹង ការក្លែងធ្វើការវាយប្រហារ ដោយនុយក្លេអ៊ែរ ។ រដ្ឋាភិបាលទីក្រុងសេអ៊ូល ក៏បានរាយការណ៍ផងដែរថា កូរ៉េខាងជើងបានបាញ់មីស៊ីល ផ្លោងជាច្រើនគ្រាប់ចូលទៅក្នុងសមុទ្រ នៅប៉ុន្មានម៉ោងមុនពេលនាវាចម្បាំង អាមេរិកមួយគ្រឿងនឹងមកដល់កូរ៉េខាងត្បូង។
យោងតាមសារព័ត៌មាន RT ចេញផ្សាយនៅថ្ងៃទី២៨ ខែមីនា ឆ្នាំ២០២៣ បានឱ្យដឹងដោយផ្អែកតាមទីក្រុងព្យុងយ៉ាងថា ខ្លួនបានធ្វើការសាកល្បងលើ “នាវាវាយប្រហារក្រោមទឹក បំពាក់នុយក្លេអ៊ែរដែលគ្មានមនុស្សបើក” ថ្មីរបស់ខ្លួននៅចន្លោះថ្ងៃទី ២៥ និង ថ្ងៃទី២៧ ខែមីនា ដោយនិយាយថា “អង្គភាពប្រយុទ្ធសាកល្បង” ត្រូវបាន “បំផ្ទុះយ៉ាងត្រឹមត្រូវនៅក្រោមទឹក” ។ ពីមុនត្រូវបានគេដាក់ ឈ្មោះថា ជាអាវុធ “សម្ងាត់” យោធារបស់ប្រទេសកូរ៉េខាងជើង បានអះអាងថា វេទិកានេះអាចបង្កើត “រលកយក្សស៊ូណាមិវិទ្យុសកម្ម” ដោយប្រើការផ្ទុះ នៅក្រោមទឹក និង “បំផ្លាញក្រុមកប៉ាល់សត្រូវ” ដោយគ្មានការរកឃើញ ទោះបីជាបានបង្ហាញព័ត៌មានលម្អិតមួយចំនួន អំពីយានគ្មានមនុស្ស បើកក៏ដោយ UAV ក៏ដោយ។
ទីភ្នាក់ងារសារព័ត៌មានរដ្ឋកូរ៉េ (KCNA) របស់កូរ៉េខាងជើងបានរាយការណ៍នៅថ្ងៃអង្គារថា អាវុធនេះនៅតែស្ថិតនៅក្រោមទឹក អស់រយៈពេលជាង ៤១ម៉ោង ហើយត្រូវបានបំផ្ទុះនៅក្នុងដែនទឹក នៃឆ្នេរសមុទ្រភាគខាងកើត របស់ប្រទេសកូរ៉េខាងជើង។
នៅក្នុងសមយុទ្ធនាពេលថ្មីៗនេះ មីស៊ីលផ្លោងយុទ្ធសាស្ត្រត្រូវបានផ្ទុកដោយគ្រាប់បែក “ក្លែងធ្វើក្បាលគ្រាប់នុយក្លេអ៊ែរ” ដើម្បីសាកល្បង “ការត្រៀមបាញ់” របស់យោធា បន្ទាប់មកដោយ “ការវាយប្រហារនុយក្លេអ៊ែរនិម្មិត” ដែលក្បាលគ្រាប់សាកល្បង ត្រូវបានបំផ្ទុះនៅចម្ងាយ ៥០០ ម៉ែត្រពីលើគោលដៅ របស់ពួកគេ។ មេបញ្ជាការនៃអង្គភាពបាញ់បង្ហោះបាននិយាយថា សមយុទ្ធនេះបានបញ្ជាក់ថា “ប្រសិនបើយើងប្រយុទ្ធ យើងប្រាកដជាបំផ្លាញសត្រូវ” បាន។ នេះបើយោងតាម KCNA ៕
