បរទេស៖ អគ្គលេខាបក្សរបស់វៀតណាម លោក ង្វៀន ភូទ្រុង បានដឹកនាំកិច្ចប្រជុំនៃលេខាធិការដ្ឋាន គណៈកម្មាធិការមជ្ឈិមបក្សកាលពីថ្ងៃអង្គារ ដើម្បីពិចារណាវិធានការវិន័យ ចំពោះមន្ត្រីដែលកំពុងកាន់អំណាច និងអតីតមន្ត្រីនៃខេត្ត Hoà Binh និង Hà Nam និងទីក្រុង Hải Phong ។
យោងតាមសារព័ត៌មាន Vietnam News ចេញផ្សាយកាលពីថ្ងៃទី២៨ ខែមីនា ឆ្នាំ២០២៣ បានឱ្យដឹងថា លេខាធិការដ្ឋានបានពិនិត្យ មើលការប្រព្រឹត្តខុសរបស់សមាជិកបួននាក់។ ពួកគេរួមមាន លោក Nguyễn Đồng សមាជិកគណៈកម្មាធិការអចិន្ត្រៃយ៍បក្សខេត្ត Hoà Binh និងជាប្រធានគណៈកម្មការព័ត៌មាន និងអប់រំនៃគណៈកម្មាធិការបក្សខេត្ត ដែលធ្លាប់ដឹកនាំគណៈកម្មាធិការកិច្ចការផ្ទៃក្នុង របស់គណៈកម្មាធិការបក្សខេត្ត និងមានតួនាទីជាអនុប្រធានអចិន្ត្រៃយ៍ នៃគណៈកម្មាធិការដឹកនាំអំពើពុករលួយ និងទប់ស្កាត់បាតុភូតអវិជ្ជមាន។
សមាជិកពីររូបផ្សេងទៀត ដែលស្ថិតក្រោមការវិភាគគឺអតីតមន្ត្រីខេត្ត Hà Nam គឺលោក Truong Minh Hiến អតីតសមាជិកគណៈកម្មាធិការ អចិន្ត្រៃយ៍បក្សខេត្ត និងជាអតីតអនុប្រធានគណៈកម្មាធិការប្រជាជនខេត្ត និងលោក Vũ Hữu Song អតីតសមាជិកបក្សខេត្ត គណៈកម្មាធិការ និងជាអតីតប្រធានមន្ទីរធនធានធម្មជាតិ និងបរិស្ថានខេត្ត ។
ទី៤ក្នុងបញ្ជីគឺឧត្តមសេនីយ Đỗ Hữu Ca អតីតសមាជិកគណៈកម្មាធិការអចិន្ត្រៃយ៍ នៃគណៈកម្មាធិការបក្សក្រុងHải Phong និងជាអតីតប្រធាននាយកដ្ឋានសន្តិសុខសាធារណៈក្រុង។
ដោយពិចារណាលើសំណើ របស់គណៈកម្មាធិការអធិការកិច្ច នៃគណៈកម្មាធិការមជ្ឈិមបក្ស លេខាធិការដ្ឋានបានសន្និដ្ឋានថា អ្នកទាំងបួនបានបង្ហាញពីភាពថោកទាប នៃគំនិតនយោបាយ សីលធម៌ និងរបៀបរស់នៅ។ ពួកគេក៏បានរំលោភលើបទប្បញ្ញត្តិ លើរឿងដែលសមាជិកបក្សមិនត្រូវធ្វើ និងលើការទទួលខុសត្រូវក្នុងការធ្វើជាគំរូដ៏ល្អ។ ពួកគេបានបំពានច្បាប់របស់បក្ស និងច្បាប់របស់រដ្ឋ បណ្តាលឱ្យមានផលវិបាក “ធ្ងន់ធ្ងរ” ធ្វើឱ្យមានការខាតបង់យ៉ាងធ្ងន់ធ្ងរដល់ប្រាក់ និងទ្រព្យសម្បត្តិរបស់រដ្ឋ ជះឥទ្ធិពលអវិជ្ជមានដល់កេរ្តិ៍ឈ្មោះ របស់អង្គការបក្ស និងបង្កឱ្យមានការព្រួយបារម្ភជាសាធារណៈ។
ដោយផ្អែកលើខ្លឹមសារ លក្ខណៈនៃអំពើខុសឆ្គងរបស់ពួកគេ និងលើវិធានរបស់គណបក្សស្តីពី ការប្រព្រឹត្តល្មើសនឹងសមាជិកបក្ស លេខាធិការដ្ឋានបានសម្រេច បណ្តេញអ្នកទាំងបួនចេញពីបក្ស ៕
ប្រែសម្រួលៈ ណៃ តុលា
