បរទេស៖ រដ្ឋមន្ត្រីក្រសួងមហាផ្ទៃបារាំងលោក Gerald Darmanin បានបញ្ជាឱ្យមន្ត្រីប៉ូលីសចំនួន ១៣ ០០០ នាក់ទៅកាន់ដងផ្លូវនៃទីក្រុងសំខាន់ៗ របស់ប្រទេសបារាំង ខណៈដែលការតវ៉ាប្រឆាំង នឹងកំណែទម្រង់សោធននិវត្តន៍ ដ៏ចម្រូងចម្រាសរបស់រដ្ឋាភិបាលនៅតែបន្ត។ លោក Darmanin បាននិយាយថា លោករំពឹងថា “សកម្មជនផ្លាស់ប្តូរសង្គម” ពីបរទេស អាចនឹងបង្កញុះញង់ ឲ្យមានអំពើហិង្សានៅក្នុងបាតុកម្ម។
យោងតាមសារព័ត៌មាន RT ចេញផ្សាយនៅថ្ងៃទី២៨ ខែមីនា ឆ្នាំ២០២៣ បានឱ្យដឹងថា លោក Darmanin បានប្រកាសពីការដាក់ពង្រាយនៅយប់ថ្ងៃចន្ទ ដោយបន្ថែមថា មន្រ្តីចំនួន ៥ ០០០ នាក់ នឹងត្រូវឈរជើងនៅទីក្រុងប៉ារីស មុនពេលការហែក្បួននៅថ្ងៃអង្គារ។
លោកបាននិយាយថា “សេវាកម្មរបស់យើងរំពឹងថា នឹងមានការរំខានយ៉ាងខ្លាំង ដល់សណ្តាប់ធ្នាប់សាធារណៈ” ដោយលោកថា “សកម្មជនផ្លាស់ប្តូរសង្គមជាង ១ ០០០ នាក់ដែលខ្លះមកពីបរទេសអាចចូលរួមក្នុងការតវ៉ានៅទីក្រុងប៉ារីស Nantes ឬ ទីក្រុង Rennes” ។
លោក Darmanin បាននិយាយថា “សកម្មជនផ្លាស់ប្តូរសង្គម” ទាំងនេះភាគច្រើនជាពួកឆ្វេងនិយម និងអ្នកអនាធិបតេយ្យ ។ លោកបានអះអាងថា «គោលដៅរបស់ពួកគេគឺធ្វើឲ្យស្ថាប័ន សាធារណៈរដ្ឋរបស់យើងមានអស្ថិរភាព ហើយនាំឲ្យមានការបង្ហូរឈាម និងដុតបំផ្លាញប្រទេសបារាំង»។
សូមជម្រាបថា ប្រទេសបារាំងបានរងគ្រោះ ដោយការតវ៉ាឥតឈប់ឈរ និងកុប្បកម្មចាប់តាំងពីប្រធានាធិបតី Emmanuel Macron មិនបានឆ្លងសភាកាលពីដើមខែនេះ ដើម្បីអនុម័តច្បាប់ដំឡើងអាយុចូលនិវត្តន៍ សម្រាប់កម្មករភាគច្រើនពី ៦២ឆ្នាំ ទៅ ៦៤ឆ្នាំ ។ បាតុករជាងមួយលាននាក់ បានដើរតាមផ្លូវកាលពីថ្ងៃព្រហស្បតិ៍ ហើយរាប់រយនាក់ត្រូវបានចាប់ខ្លួននៅទីក្រុងប៉ារីស បន្ទាប់ពីមានការប៉ះទង្គិចគ្នាជាមួយប៉ូលិស និងការដុតភ្លើងនៅតាមដងផ្លូវនៃរដ្ឋធានីបារាំង
ប្រែសម្រួលៈ ណៃ តុលា
