វ៉ាស៊ីនតោន៖ ប្រធានាធិបតី សហរដ្ឋអាមេរិក លោក ចូ បៃដិន បានប្រាប់អ៊ីស្រាអែលថា ខ្លួនមិនអាចបន្តការជំរុញ ទៅមុខជាមួយនឹងកំណែទម្រង់ ប្រព័ន្ធតុលាការដ៏ចម្រូងចម្រាស ដោយឥឡូវនេះត្រូវបានផ្អាក ដែលបានជំរុញឱ្យ មានចលាចលជាច្រើនខែ ហើយនាយករដ្ឋមន្រ្តីអ៊ីស្រាអែលលោក បេនចាមីន ណេតាន់យ៉ាហ៊ូ បានឆ្លើយតបទៅវិញថា លោកមិនធ្វើការសម្រេចចិត្តដោយផ្អែកលើសម្ពាធមកពីក្រៅប្រទេសនោះឡើយ។
ការអត្ថាធិប្បាយរបស់លោក បៃដិន កាលពីថ្ងៃអង្គារបានកើតឡើង ខណៈដែលលោក ណេតាន់យ៉ាហ៊ូ កំពុងត្រូវបានចោទប្រកាន់ដោយក្រុមប្រឆាំងថា បានជិះជាន់លើលទ្ធិប្រជាធិបតេយ្យរបស់អ៊ីស្រាអែល ក្នុងការប៉ុនប៉ង ដើម្បីពង្រឹងអំណាចផ្ទាល់ខ្លួនដែលនាំឱ្យមានការតវ៉ា និងការវាយប្រហារដ៏ខ្វិននៅទូទាំងប្រទេសអ៊ីស្រាអែល។
លោកបានលើកឡើងថា “ដូចជាអ្នកគាំទ្រដ៏ខ្លាំងរបស់អ៊ីស្រាអែល ជាច្រើននាក់ ខ្ញុំមានការព្រួយបារម្ភខ្លាំងណាស់។ ពួកគេមិនអាចបន្តតាមផ្លូវនេះបានទេ ហើយខ្ញុំបានបញ្ជាក់យ៉ាងច្បាស់ហើយ”។
លោក បៃដិន បានលើកឡើងថា “ខ្ញុំសង្ឃឹមថា នាយករដ្ឋមន្ត្រីលោក ណេតាន់យ៉ាហ៊ូ នឹងធ្វើសកម្មភាពតាមរបៀបមួយ ដែលលោកនឹងព្យាយាមធ្វើការសម្រុះសម្រួលពិតប្រាកដមួយចំនួន ប៉ុន្តែនៅតែត្រូវមើលឃើញ” ដោយលោក បៃដិន បានបន្ថែមថា លោកមិនកំពុងពិចារណាអញ្ជើញមេដឹកនាំអ៊ីស្រាអែលទៅកាន់សេតវិមាននោះទេ ហើយយ៉ាងហោចណាស់ មិននៅក្នុងរយៈពេលដ៏ខ្លី” ។
ថ្លែងនៅពេលក្រោយនៅទីក្រុង Washington, DC លោក បៃដិន បានអំពាវនាវឱ្យរដ្ឋបាលរបស់លោក ណេតាន់យ៉ាហ៊ូ ទម្លាក់ច្បាប់តុលាការដ៏ចម្រូងចម្រាសនេះចោល នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Aljazeera។
លោកបានប្រាប់ក្រុមអ្នកយកព័ត៌មានថា “ខ្ញុំសង្ឃឹមថា ពួកគេនឹងដើរចេញពីវា” ។ លោកបានបន្តថា “អ៊ីស្រាអែលជាប្រទេសអធិបតេយ្យមួយ ដែលធ្វើការសម្រេចចិត្តដោយឆន្ទៈរបស់ប្រជាជនខ្លួន និងមិនផ្អែកលើសម្ពាធពីបរទេស រួមទាំងពីមិត្តល្អបំផុត”។
លោក ណេតាន់យ៉ាហ៊ូ បានលើកឡើងថា រដ្ឋបាលរបស់លោក កំពុងខិតខំធ្វើកំណែទម្រង់ “តាមរយៈការឯកភាពទូលំទូលាយ”។ លោកថា “ខ្ញុំបានស្គាល់ប្រធានាធិបតីអាមេរិកលោក ចូ បៃដិន អស់រយៈពេលជាង ៤០ឆ្នាំមកហើយ ហើយខ្ញុំសូមកោតសរសើរ ចំពោះការប្តេជ្ញាចិត្តដ៏យូរអង្វែងរបស់លោក ចំពោះអ៊ីស្រាអែល”៕
ប្រែសម្រួល ឈូក បូរ៉ា
