បរទេស៖ អតីតតារាសិចដែលជាបេះដូង នៃការចោទប្រកាន់ជា ប្រវត្តិសាស្ត្រទៅលើលោក Donald Trump នៅញូវយ៉កត្រូវបានបញ្ជាឱ្យ បង់ប្រាក់ឱ្យលោកច្រើនជាង ១២១ ០០០ដុល្លារ សម្រាប់ថ្លៃសេវាផ្លូវច្បាប់ នៅក្នុងករណីដែលមិនពាក់ព័ន្ធ។
យោងតាមសារព័ត៌មាន BBC ចេញផ្សាយកាលពីថ្ងៃទី៥ ខែមេសា ឆ្នាំ២០២៣ បានឱ្យដឹងថា នាង Stormy Daniels ដែលត្រូវបានចោទប្រកាន់ថា មានទំនាក់ទំនងស្នេហាជាមួយលោក Trump ក្នុងឆ្នាំ ២០០៦ បានចាញ់ក្តីរឿងបរិហារកេរ្តិ៍របស់នាងតាមរយៈ tweet ឆ្នាំ ២០១៨ ដែលសរសេរដោយ អតីតប្រធានាធិបតីអាមេរិក។
ចៅក្រមសាលាឧទ្ធរណ៍ នៅរដ្ឋកាលីហ្វ័រញ៉ា បានច្រានចោលបណ្តឹងរបស់នាង Daniels ហើយបានប្រគល់ឱ្យលោក Trump នូវការទូទាត់ថ្លៃសេវាផ្លូវច្បាប់ តែយ៉ាងណាក៏ដោយ លោក Trump បានបដិសេធចំពោះរឿងនេះ។
បណ្ដឹងបរិហារកេរ្តិ៍រដ្ឋប្បវេណី ដែលនាំមកដោយនាង Daniels គឺដាច់ដោយឡែកពីការចោទប្រកាន់ចំនួន ៣៤ ដែលបានប្តឹងលោក Trump ក្នុងទីក្រុង Manhattan កាលពីថ្ងៃអង្គារ។ ខណៈពេលដែលករណីទាំងពីរពាក់ព័ន្ធនឹងនាង Daniels ការចោទប្រកាន់នៅញូវយ៉ក ទាក់ទងនឹងការបង់ប្រាក់ដែលធ្វើឡើង ដល់នាងក្នុងអំឡុងពេល បោះឆ្នោតប្រធានាធិបតីឆ្នាំ ២០១៦ ដែលត្រូវបានអះអាងថា ជា “លុយបំបិទមាត់” ដើម្បីរក្សាភាពស្ងៀមស្ងាត់ ប៉ុន្តែមិនត្រូវបានកត់ត្រាត្រឹមត្រូវ។
នាង Daniels ដែលមានឈ្មោះស្របច្បាប់ថា Stephanie Clifford បានប្តឹងលោក Trump បន្ទាប់ពីគាត់បានហៅការ ចោទប្រកាន់របស់លោកស្រី Daniels ថាជា “ការងារក្រៅផ្លូវការ” នៅក្នុង tweet នៅថ្ងៃទី ១៨ ខែមេសា ឆ្នាំ ២០១៨ ។
នៅក្នុងលើកឡើងនោះ លោក Trump បានច្រានចោលការចោទប្រកាន់ របស់លោកស្រី Daniels ដែលថាបុរសមិនស្គាល់មុខ បានគម្រាមនាងនៅចំណតរថយន្ត ដើម្បីឱ្យនាងរក្សាភាពស្ងៀមស្ងាត់អំពី ទំនាក់ទំនងស្នេហារបស់នាងជាមួយលោក Trump ។
ករណីនេះត្រូវបានច្រានចោលបន្ទាប់ពីចៅក្រម Samuel James Otero នៃសាលាឧទ្ធរណ៍ទី 9 បាននិយាយថា សេចក្តីថ្លែងការណ៍របស់លោក Trump ត្រូវបានការពារដោយវិសោធនកម្មទីមួយ។
បើតាមសារព័ត៌មាន CNN បានរាយការណ៍ថា នាង Daniels អាយុ ៤៤ ឆ្នាំត្រូវបានបញ្ជាឱ្យបង់ថ្លៃផ្លូវច្បាប់របស់លោក Trump ក្នុងចំនួន ២៩៣ ០០០ដុល្លារ ។ អ្នកស្រីបានប្ដឹងតវ៉ាដោយលើកហេតុផលថា ថ្លៃផ្លូវច្បាប់ខ្ពស់ពេក ប៉ុន្តែត្រូវចាញ់។
បើតាមការរាយការណ៍របស់ CBS ដែលជាដៃគូប្រព័ន្ធផ្សព្វផ្សាយរបស់អាមេរិក BBC គឺថា តុលាការបានរកឃើញថា “ទឡ្ហីករណ៍របស់នាងដែលថា ការស្នើសុំថ្លៃគឺមិនសមហេតុផល ហើយលើសពីនេះមិនត្រូវ បានបង្កើតឡើងឱ្យបានល្អ»។ នាង Daniels ត្រូវបានបញ្ជាឱ្យបង់ប្រាក់ចំនួន ២៤៥ ០០០ដុល្លារ បន្ថែមទៀត បន្ទាប់ពីនាងបានចាញ់បណ្តឹងឧទ្ធរណ៍នោះ។
កាលពីថ្ងៃអង្គារ – ខណៈដែលលោក Trump ត្រូវបានផ្ដិតមេដៃ និងនាំខ្លួនដោយប៉ូលីសចូលទៅក្នុងបន្ទប់សវនាការនៅសង្កាត់ Manhattan ហើយបានស្តាប់ចៅក្រមអាននូវការចោទប្រកាន់ពីបទឧក្រិដ្ឋចំនួន ៣៤ហើយនោះ អ្នកស្រី Daniels ត្រូវបានបញ្ជាឱ្យបង់ប្រាក់ឱ្យលោក Trump ចំនួន ១២១ ៩៧២ ដុល្លារ។
មេធាវីរបស់លោក Trump គឺលោក Harmeet Dhillon បានអបអរសាទរការកាត់ក្តីនៅរដ្ឋកាលីហ្វ័រញ៉ា ដោយសរសេរនៅលើ Twitter ថា “សូមអបអរសាទរចំពោះលោកប្រធានាធិបតី Trump ចំពោះជ័យជម្នះចុងក្រោយ នៃថ្លៃមេធាវីសម្រាប់ការពេញចិត្ត របស់គាត់នៅព្រឹកនេះ។ “ជារួម ក្រុមរបស់យើងបានទទួលថ្លៃមេធាវីជាង ៦០០ ០០០ ដុល្លារ នៅក្នុងវិវាទដែលមិនសមហេតុផល ដែលផ្តួចផ្តើមដោយ Stormy Daniels” ៕
ប្រែសម្រួលៈ ណៃ តុលា
![](https://dap-news.com/wp-content/uploads/2020/08/1-1.png)