តេអេរ៉ង់ ៖ មន្ត្រីអ៊ីរ៉ង់ម្នាក់បានឲ្យដឹងថា កងឆ្មាំបដិវត្តន៍អ៊ីស្លាម (IRGC) របស់អ៊ីរ៉ង់បានសាកល្បងដោយជោគជ័យនូវយន្តហោះដ្រូនធុន kamikaze រយៈចម្ងាយឆ្ងាយ និងមានភាព ជាក់លាក់ខ្ពស់ ដែលបំពាក់ដោយក្បាលគ្រាប់ ៥០ គីឡូក្រាម នេះបើយោងតាមការចុះផ្សាយ របស់ទីភ្នាក់ងារ សារព័ត៌មានចិនស៊ិនហួ។
លោក Ali Kouhestani ប្រធានអង្គការស្រាវជ្រាវ និងស្វ័យភាពជីហាត នៃកងកម្លាំង មូលដ្ឋានរបស់ IRGC បានធ្វើការកត់សម្គាល់ នៅក្នុងបទសម្ភាសន៍ ជាមួយទីភ្នាក់ងារសារព័ត៌មាន Tasnim ពាក់កណ្តាលផ្លូវការ ដែលត្រូវបាន ចេញផ្សាយកាលពីថ្ងៃអាទិត្យ។
លោក Kouhestani បានលើកឡើងថា យន្ដហោះដ្រូនធុន (UAV) ដែលមានឈ្មោះថា “Meraj-532” មានរយៈចម្ងាយ ៤៥០ គីឡូម៉ែត្រ និងអាចហោះហើរក្នុងរយៈកម្ពស់អតិបរមា ១២០០០ ហ្វីតក្នុងរយៈពេល ៣ម៉ោងជាប់គ្នា ដោយកត់សម្គាល់ថា ដ្រូនអាចវាយប្រហារគោលដៅដោយ កំណត់ភាពត្រឹមត្រូវ។
លោកបានបន្ដថា UAV មានក្បាលគ្រាប់ទម្ងន់ ៥០ គីឡូក្រាម ហើយអាចប្រមូលផ្តុំ និងរៀបចំ សម្រាប់ការហោះហើរបានយ៉ាងងាយស្រួល ដែលធ្វើឱ្យវាស័ក្តិសម សម្រាប់ប្រតិបត្តិការប្រតិកម្មរហ័ស។
អ៊ីរ៉ង់ បានធ្វើឱ្យមានការរីកចម្រើនគួរឱ្យកត់សម្គាល់ក្នុងវិស័យផលិត UAVs ក្នុងរយៈពេលប៉ុន្មានឆ្នាំកន្លងមកនេះ។ បច្ចុប្បន្ន ប្រទេសនេះ កំពុងផលិតយន្តហោះដ្រូន ដែលមានសមត្ថភាពអាចបំពេញ បេសកកម្មបានយ៉ាងទូលំទូលាយ៕
ប្រែសម្រួល ឈូក បូរ៉ា
