ហិង្ហបុរី៖ កង្វះគោលនយោបាយហិរញ្ញវត្ថុឯករាជ្យ និងការត្រួតពិនិត្យបានធ្វើឱ្យឧស្សាហកម្មធនាគារអឺរ៉ុប ស្ថិតក្នុងភាព ចលាចល ដោយសារ ហានិភ័យ ដែលហៀរចេញពីប្រព័ន្ធហិរញ្ញវត្ថុរបស់សហរដ្ឋអាមេរិក នេះបើតាមអ្នកសេដ្ឋកិច្ច សិង្ហបុរី បានប្រាប់ស៊ីនហួក្នុងបទសម្ភាសន៍ថ្មីៗនេះ។
លោក Yan Li សាស្ត្រាចារ្យជាន់ខ្ពស់នៃសាកលវិទ្យាល័យ Nanyang Technological University របស់ប្រទេស សិង្ហបុរីបានឲ្យដឹងថា វិបត្តិដែលបានកើតឡើងចំពោះធនាគារ Credit Suisse និង Deutsche Bank បានឆ្លុះបញ្ចាំងពីភាព ផុយស្រួយរបស់ធនាគារអឺរ៉ុបមួយចំនួន។
លោក Yan បានកត់សម្គាល់ថា “ហានិភ័យហិរញ្ញវត្ថុប្រព័ន្ធត្រួតស៊ីគ្នា និងការខ្វះការជឿទុកចិត្តរួមគ្នាបាន ជំរុញឱ្យមាន វិបត្តិធនាគារនៅអឺរ៉ុប” ដោយបន្ថែមថា ស្ថានភាពបែបនេះអាចនឹងធ្វើឱ្យឧស្សាហកម្មធនាគារ និងសេដ្ឋកិច្ចអឺរ៉ុប ប្រឈមមុខនឹងការលំបាកនាពេលអនាគត។
សេដ្ឋវិទូរូបនេះបានបន្ដថា “សហរដ្ឋអាមេរិក អាចបន្ថយការដំឡើងអត្រាការប្រាក់ ប៉ុន្តែនឹងមិនបញ្ឈប់ឡើយ ដូច្នេះហើយ ឧស្សាហកម្មធនាគារអឺរ៉ុប នឹងប្រឈមមុខនឹងហានិភ័យជាប្រព័ន្ធ ដែលកំពុងកើនឡើង”។
ទោះជាយ៉ាងណាក៏ដោយ លោក Yan បានលើកឡើង វិបត្តិធនាគារបច្ចុប្បន្ននៅក្នុងប្រទេសមួយចំនួននៅអឺរ៉ុប និងសហរដ្ឋ អាមេរិក ទំនងជាមិនធ្លាក់ចុះទៅជាវិបត្តិហិរញ្ញវត្ថុពិភពលោកមួយផ្សេងទៀត ដែលស្រដៀងនឹង អ្វីដែលបាន កើតឡើង ក្នុងឆ្នាំ២០០៨ នោះទេ។
លោកបានបន្ថែមថា “ការដួលរលំនៃឧស្សាហកម្មធនាគារ និងសូម្បីតែប្រព័ន្ធហិរញ្ញវត្ថុនៅអឺរ៉ុប និងសហរដ្ឋអាមេរិក គឺ មិនអាចទ្រាំទ្របាន ដូច្នេះរដ្ឋាភិបាលពាក់ព័ន្ធនឹងប្រឹងប្រែងឱ្យអស់ពីសមត្ថភាពដើម្បីបញ្ឈប់វិបត្តិមិនឱ្យរីករាលដាល” ។
នៅទ្វីបអឺរ៉ុប ធនាគារ Credit Suisse ដែលជាធនាគារធំទីពីរនៅប្រទេសស្វីស ត្រូវបានកាន់កាប់ដោយធនាគារយក្សស្វីស UBS ដោយសារវិបត្តិសាច់ប្រាក់ងាយស្រួល និងការប្រែប្រួលទីផ្សារ។
នៅក្នុងខែមីនាផងដែរ តម្លៃភាគហ៊ុនរបស់ធនាគារ Deutsche Bank ដែលជាអ្នកផ្តល់ប្រាក់កម្ចីដ៏ធំបំផុតរបស់ប្រទេស អាល្លឺម៉ង់ បានធ្លាក់ចុះចំពេលមានការព្រួយបារម្ភកាន់តែខ្លាំងឡើងអំពីសុខភាពរបស់ធនាគារអឺរ៉ុប៕
ប្រែសម្រួល ឈូក បូរ៉ា
