វ៉ាស៊ីនតោន៖ នាយករដ្ឋមន្ត្រីអ៊ុយក្រែនលោក Denys Shmyhal បានឲ្យដឹងថា លោកបានពិភាក្សាអំពីការគាំទ្រផ្នែកយោធា សម្រាប់ប្រទេសរបស់លោកជាមួយរដ្ឋមន្ត្រីការពារជាតិអាមេរិក Lloyd Austin ។
លោក Shmyhal ដែលកំពុងបំពេញទស្សនកិច្ចនៅសហរដ្ឋអាមេរិក បានសរសេរនៅក្នុងការបង្ហោះ លើបណ្ដាញ Telegram ថា “យើងបានពិភាក្សាលម្អិតអំពីតម្រូវការបន្ទាន់របស់អ៊ុយក្រែន សម្រាប់ការអនុវត្តជោគជ័យនៃប្រតិបត្តិការវាយលុកមួយទៀតដើម្បីរំដោះទឹកដីអ៊ុយក្រែន”។
លោក Shmyhal បានលើកឡើងថា ជាពិសេស អ៊ុយក្រែន ត្រូវការប្រព័ន្ធការពារអាកាស កាំភ្លើងធំ និងឧបករណ៍ កាំភ្លើងត្បាល់ និងគ្រាប់រំសេវសម្រាប់ពួកគេ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោកបានបន្ថែមថា អ៊ុយក្រែនក៏ពឹងលើសហរដ្ឋអាមេរិកក្នុងការផ្តល់ឱ្យវានូវកាំជ្រួចរយៈចម្ងាយឆ្ងាយ។ នៅព្រឹកថ្ងៃដដែល Shmyhal បានមកដល់សហរដ្ឋអាមេរិក សម្រាប់ដំណើរទស្សនកិច្ចមួយ ដើម្បីពិភាក្សាអំពីការគាំទ្រផ្នែកយោធា ហិរញ្ញវត្ថុ និងទណ្ឌកម្ម សម្រាប់អ៊ុយក្រែន ក៏ដូចជាការវិនិយោគ និងជំនួយសម្រាប់ការកសាងឡើងវិញ៕
ប្រែសម្រួល ឈូក បូរ៉ា
