បរទេស៖ ពលរដ្ឋក្នុងទីក្រុង Belgorod ប្រមាណជា៣០០០នាក់ ត្រូវបានជន្លៀសខ្លួនចេញ ក្រោយរកឃើញគ្រាប់បែក មិនទាន់ផ្ទុះមួយគ្រាប់ នៅក្នុងតំបន់ទីប្រជុំជននេះ បើយោងតាមការបញ្ជាក់ ដោយលោកអភិបាលក្រុង Vyacheslav Gladkov។
យោងតាមការចេញផ្សាយរបស់ RT បានឲ្យដឹងដែរថាទីក្រុង Belgorod ស្ថិតនៅក្បែរទៅនឹងព្រំដែន ជាមួយនឹងប្រទេសអ៊ុយក្រែន ហើយកាលពីថ្ងៃព្រហស្បតិ៍ កន្លងមកក៏ជាទីតាំងដែលទទួលរងនូវ ការបំផ្ទុះគ្រាប់បែកដ៏ធំមួយផងដែល បានធ្វើឲ្យមនុស្ស៣នាក់ រងរបួសនិងបំផ្លាញរថយន្ត ជាច្រើនគ្រឿង។
ក្រសួងការពារជាតិ នៃប្រទេសរុស្សី បានប្រកាសឆ្លើយតបទៅនឹងហេតុការណ៍នេះផងដែរ ថាវាត្រូវបានបង្កឡើង ដោយមិនមានចេតនានោះទេពោល គឺជាការទំលាក់គ្រាប់បែក ដោយច្រឡំគោលដៅពីសំណាក់ យន្តហោះចម្បាំង Su-34 ប៉ុណ្ណោះ។
តាមការបញ្ជាក់បន្ថែម ដោយលោកអភិបាលក្រុង បានឲ្យដឹងដែរថាពលរដ្ឋប្រមាណ ជា៣០០០នាក់ បានធ្វើដំណើរជន្លៀសខ្លួនចេញ ទៅរកទីតាំងសុវត្ថិភាព ជាមួយនឹងរថយន្តក្រុងប្រមាណជា៩០គ្រឿង៕
ប្រែសម្រួល៖ស៊ុនលី
