ប៉េកាំង៖ អ្នកនាំពាក្យក្រសួងការបរទេសចិន បានឲ្យដឹងថា ប្រទេសចិនគោរពឋានៈរបស់អតីតសាធារណរដ្ឋសូវៀតជាប្រទេសអធិបតេយ្យបន្ទាប់ពីការរំលាយសហភាពសូវៀត នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
កាលពីថ្ងៃសុក្រសប្តាហ៍មុន ឯកអគ្គរដ្ឋទូតចិនប្រចាំនៅប្រទេសបារាំងលោក Lu Shaye បានផ្តល់បទសម្ភាសន៍ពីប្រព័ន្ធផ្សព្វផ្សាយបារាំងលើភាពជាម្ចាស់នៃតំបន់គ្រីមៀ លោកឯកអគ្គរដ្ឋទូតបានឲ្យដឹងថា វាអាស្រ័យលើរបៀបដែលបញ្ហាត្រូវបានគេយល់ឃើញ។ ឧបទ្វីបគ្រីមឿ គឺជាផ្នែកប្រវត្តិសាស្ត្រនៃប្រទេសរុស្ស៊ី ហើយត្រូវបានផ្តល់ជូនដល់អ៊ុយក្រែន ដោយអតីតមេដឹកនាំសហភាពសូវៀតលោក Nikita Khrushchev ។
ឆ្លើយតបទៅនឹងសំណួរពាក់ព័ន្ធ អ្នកនាំពាក្យក្រសួងការបរទេសចិន លោកស្រី ម៉ៅ នីង បានប្រាប់សន្និសីទសារព័ត៌មានប្រចាំថ្ងៃថា ជំហររបស់ចិន លើបញ្ហាពាក់ព័ន្ធនៅតែមិនផ្លាស់ប្តូរ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោកស្រី ម៉ៅ បានបន្ដថា ចំពោះបញ្ហាទាក់ទងនឹងអធិបតេយ្យភាពទឹកដី ជំហររបស់ចិន គឺស្រប និងច្បាស់លាស់។ ប្រទេសចិន គោរពអធិបតេយ្យភាព ឯករាជ្យភាព និងបូរណភាពទឹកដីរបស់ប្រទេសទាំងអស់ ហើយប្រកាន់ខ្ជាប់នូវគោលបំណង និងគោលការណ៍នៃធម្មនុញ្ញអង្គការសហប្រជាជាតិ។
បន្ទាប់ពីសហភាពសូវៀត ត្រូវបានរំលាយ ប្រទេសចិន គឺជាប្រទេសមួយក្នុងចំណោមប្រទេសដំបូងគេ ដែលបង្កើតទំនាក់ទំនងការទូតជាមួយប្រទេស ដែលពាក់ព័ន្ធ។ ចាប់តាំងពីបង្កើតទំនាក់ទំនងការទូតជាមួយប្រទេសទាំងនេះមក ប្រទេសចិន បានអនុវត្តតាមគោលការណ៍នៃការគោរពគ្នាទៅវិញទៅមក និងសមភាពក្នុងការអភិវឌ្ឍទំនាក់ទំនងទ្វេភាគីមិត្តភាព និងសហប្រតិបត្តិការជាមួយពួកគេ។ លោកស្រីបានបន្ដថា ប្រទេសចិន គោរពឋានៈរបស់អតីតសាធារណរដ្ឋសូវៀត ជាប្រទេសអធិបតេយ្យបន្ទាប់ពីការរំលាយសហភាពសូវៀត។
លោកស្រីបន្ថែមថា ចំពោះបញ្ហាអ៊ុយក្រែន ជំហររបស់ចិន គឺច្បាស់លាស់ និងស្រប “យើងនឹងបន្តធ្វើការជាមួយសហគមន៍អន្តរជាតិ ដើម្បីធ្វើការរួមចំណែកផ្ទាល់ខ្លួនរបស់យើងក្នុងការសម្របសម្រួលដំណោះស្រាយនយោបាយនៃវិបត្តិអ៊ុយក្រែន”៕ ឈូក បូរ៉ា
