បរទេស៖ មន្ត្រីក្រុងវ៉ាស៊ីនតោន បានប្រាប់អ្នកយកព័ត៌មានកាលពីថ្ងៃអង្គារថា សហរដ្ឋអាមេរិក នឹងដាក់ពង្រាយ នាវាមុជទឹកដែល បំពាក់ដោយអាវុធនុយក្លេអ៊ែរទៅកាន់កូរ៉េខាងត្បូង។ គោលបំណងដើម្បីរារាំងកូរ៉េខាងជើង ពីការបាញ់មីស៊ីលបន្ថែមទៀត ការដាក់ពង្រាយនេះក៏ទំនងជាមានគោលបំណងធានាដល់ សាធារណជនកូរ៉េខាងត្បូងផងដែរ ដែលថ្មីៗនេះបានដឹងថា សហរដ្ឋអាមេរិក បានធ្វើចារកម្មលើ រដ្ឋាភិបាលរបស់ពួកគេ។
យោងតាមសារព័ត៌មាន RT ចេញផ្សាយនៅថ្ងៃទី២៦ ខែមេសា ឆ្នាំ២០២៣ បានឱ្យដឹងថា ក្រុមមន្ត្រីបាននិយាយនៅក្នុង ការអត្ថាធិប្បាយទៅកាន់ប្រព័ន្ធផ្សព្វផ្សាយជាច្រើនរបស់សហរដ្ឋអាមេរិកថា ផែនការនេះនឹងត្រូវបានប្រកាស ជាផ្លូវការដោយប្រធានាធិបតីសហរដ្ឋអាមេរិក Joe Biden និងសមភាគីកូរ៉េខាងត្បូងលោកប្រធានាធិបតី Yoon Suk-yeol នៅសេតវិមាននៅថ្ងៃពុធ។
មេដឹកនាំទាំងពីរនាក់ត្រូវបានគេរំពឹងថា នឹងចុះហត្ថលេខាលើកិច្ចព្រមព្រៀងដែលគេស្គាល់ថាជា ‘សេចក្តីប្រកាស វ៉ាស៊ីនតោន’ ក្រោមការដែលអាមេរិក-កូរ៉េខាងត្បូង នឹងបង្កើនការចែករំលែកព័ត៌មានសម្ងាត់ និងសមយុទ្ធយោធារួមគ្នា ខណៈដែលសហរដ្ឋអាមេរិកនឹងបញ្ជូននាវាមុជទឹក និងយន្តហោះទម្លាក់គ្រាប់បែកនុយក្លេអ៊ែរ ទៅកូរ៉េខាងត្បូងតាមលំដាប់លំដោយ។
មន្ត្រីអនាមិកម្នាក់បាននិយាយថា “យើងមានបំណងចាត់វិធានការដើម្បីធ្វើឱ្យការទប់ស្កាត់របស់យើងមើលឃើញកាន់ តែច្បាស់តាមរយៈ ការដាក់ ពង្រាយទ្រព្យ សម្បត្តិយុទ្ធសាស្រ្តជាប្រចាំ រួមទាំងដំណើររបស់នាវាមុជទឹក នុយក្លេអ៊ែររបស់សហរដ្ឋអាមេរិក ទៅកាន់កូរ៉េខាងត្បូង ដែលវាមិនបានកើតឡើងតាំងពីដើមទសវត្សរ៍ឆ្នាំ ១៩៨០” នោះទេ។ ពួកគេបានប្រៀបធៀបការផ្លាស់ប្តូរទៅនឹង “អ្វីដែលយើងបានធ្វើជាមួយសម្ព័ន្ធមិត្តអ៊ឺរ៉ុបកំឡុង ពេលកម្រិតខ្ពស់នៃសង្រ្គាមត្រជាក់នៅក្នុងរយៈពេលស្រដៀងគ្នានៃការគំរាមកំហែងពីខាងក្រៅដែលមានសក្តានុពល” ដោយសំដៅទៅលើកម្មវិធីមីស៊ីលរបស់ភាគខាងជើង៕
