តេអេរ៉ង់៖ តុលាការស៊ីវិលអ៊ីរ៉ង់ ក្នុងទីក្រុងតេអេរ៉ង់ បានសម្រេចថា សហរដ្ឋអាមេរិក ត្រូវបង់ប្រាក់សំណងចំនួន ៣១២,៩៥ លានដុល្លារអាមេរិក ដល់គ្រួសារជនរងគ្រោះ នៃការវាយប្រហារភេរវកម្មពីរលើក ដែលបានកើតឡើងនៅក្នុងសភារបស់ប្រទេសអ៊ីរ៉ង់ និងទីសក្ការបូជា Imam Khomeini ក្នុងទីក្រុងតេអេរ៉ង់កាលពីខែមិថុនា ឆ្នាំ២០១៧ ។
យោងតាមទីភ្នាក់ងារ សារព័ត៌មាន Mizan នៃតុលាការរបស់ប្រទេសអ៊ីរ៉ង់ សេចក្តីសម្រេចនេះត្រូវបានចេញកាលពីថ្ងៃពុធ បន្ទាប់ពីពាក្យបណ្តឹង ត្រូវបានប្តឹងដោយក្រុមគ្រួសារ នៃអ្នកដែលបាត់បង់ជីវិត ឬរងរបួសជាអចិន្ត្រៃយ៍ក្នុងការវាយប្រហារ។
តុលាការបានរកឃើញថា អង្គភាព និងមន្ត្រីរដ្ឋាភិបាលអាមេរិកមួយចំនួន ទទួលខុសត្រូវ ចំពោះការគាំទ្រ និងជួយដល់ក្រុមភេរវកររដ្ឋអ៊ីស្លាម (IS) ដែលធ្វើការវាយប្រហារនេះ។
សំណងនេះរួមមាន ៩,៩៥ លានដុល្លារអាមេរិក សម្រាប់ការខូចខាតសម្ភារៈ ១០៤ លានដុល្លារ សម្រាប់ការខូចខាតខាងសីលធម៌ និង ១៩៩ លានដុល្លារសម្រាប់ការខូចខាតផ្នែកទោស។
តុលាការបានរកឃើញថា “ជនសង្ស័យ” មានទំនួលខុសត្រូវ ចំពោះការវាយប្រហារភេរវកម្មក្នុងទីក្រុងតេអេរ៉ង់ ពីព្រោះមានភស្តុតាងដែលថា រដ្ឋាភិបាល និងមន្ត្រីរបស់សហរដ្ឋអាមេរិក បានដើរតួយ៉ាងសំខាន់ក្នុងការរៀបចំ និងដឹកនាំក្រុមភេរវករ រួមទាំងក្រុមរដ្ឋឥស្លាម IS ផងដែរ។
ភ័ស្តុតាងនេះរួមមានព័ត៌មាន និងព័ត៌មានដែលអាចទុកចិត្តបានដែលត្រូវបានបោះពុម្ពផ្សាយ ដោយប្រព័ន្ធផ្សព្វផ្សាយរបស់សហរដ្ឋអាមេរិក ក៏ដូចជាសៀវភៅ និងសុន្ទរកថារបស់មន្ត្រីសហរដ្ឋអាមេរិក ដែលបង្ហាញពីតួនាទី របស់ទីភ្នាក់ងារស៊ើបការណ៍ សម្ងាត់កណ្តាលក្នុងការបង្កើតក្រុមភេរវករទាំងនេះ ដូចជាក្រុមរដ្ឋឥស្លាម IS នេះបើយោងតាមទីភ្នាក់ងារសារព័ត៌មាន Mizan ។
យ៉ាងហោចណាស់មនុស្ស ១៣ នាក់បានស្លាប់ និង ៤៣ នាក់ផ្សេងទៀតបានរងរបួសនៅក្នុងការវាយប្រហារពីរលើកក្នុងទីក្រុងតេអេរ៉ង់ កាលពីថ្ងៃទី០៧ ខែមិថុនា ឆ្នាំ២០១៧ ដែលក្រុមរដ្ឋឥស្លាម IS បានប្រកាសទទួលខុសត្រូវ។ ខ្មាន់កាំភ្លើង ៦នាក់បានចូលរួមក្នុងការវាយប្រហារ ហើយពួកគេទាំងអស់ត្រូវបានសម្លាប់ក្នុងប្រតិបត្តិការ៕
ប្រែសម្រួល ឈូក បូរ៉ា
