សេអ៊ូល៖ ទីភ្នាក់ងារសារព័ត៌មានកូរ៉េខាងជើង បានចុះផ្សាយថា ដំណើរទស្សនកិច្ចចុងក្រោយបង្អស់របស់ ប្រធានាធិបតី កូរ៉េខាងត្បូងលោក Yoon Suk-yeol គឺជា “ដំណើរដ៏អរិភាព ឈ្លានពាន និងបង្កហេតុ និងគ្រោះថ្នាក់បំផុតសម្រាប់ សង្គ្រាមនុយក្លេអ៊ែរ” ។
នៅក្នុងការអត្ថាធិប្បាយមួយ ទីភ្នាក់ងារសារព័ត៌មានកណ្តាលកូរ៉េ (KCNA) បានសម្តែងការរិះគន់យ៉ាងចាស់ដៃ និងការព្រមានយ៉ាងម៉ឺងម៉ាត់ ដោយបានរិះគន់ទៅលើឯកសារ និងវោហាសាស្ត្រ ដែលចេញមកពីកិច្ចចរចា កំពូលរវាងសហរដ្ឋអាមេរិក និងកូរ៉េខាងត្បូង នាពេលថ្មីៗនេះនៅទីក្រុងវ៉ាស៊ីនតោន។
ការអត្ថាធិប្បាយបានចាប់ផ្តើមដោយការ ដាក់សេចក្តីប្រកាសរបស់ទីក្រុងវ៉ាស៊ីនតោន ដែលជាឯកសារហត្ថលេខា ស្តីពីការធ្វើឱ្យប្រសើរឡើងនូវ “ការរារាំងបន្ថែម” ប្រឆាំងនឹងកូរ៉េខាងជើង ដោយបានថ្កោលទោសវាថាជា “ផលិតផលធម្មតានៃគោលនយោបាយអរិភាពដ៏អាក្រក់ ចំពោះកូរ៉េខាងជើង” ដែលត្រូវបានរចនាឡើង ដើម្បីបង្កើត “សង្រ្គាមនុយក្លេអ៊ែរ ប្រឆាំងនឹងកូរ៉េខាងជើង មិនអាចសម្រេចបាន”។
សារព័ត៌មានដដែលបានបន្ថែមថា “មិនមានរឿងមុននោះទេ ដែលថាពួកគេ (សហរដ្ឋអាមេរិក និងកូរ៉េខាងត្បូង) បានចាត់តាំងកូរ៉េខាងជើង ជាគោលដៅ សម្រាប់ការវាយប្រហារនុយក្លេអ៊ែរជាសាធារណៈដល់ពិភពលោក ហើយបាននិយាយដោយមិនលាក់លៀមអំពីការដាក់ពង្រាយទ្រព្យសម្បត្តិនុយក្លេអ៊ែរជាយុទ្ធសាស្ត្រជាប្រចាំ និងប្រកបដោយនិរន្តរភាពទៅកាន់ឧបទ្វីបកូរ៉េ”។
ការអត្ថាធិប្បាយបន្ទាប់មកមានការរិះគន់មេដឹកនាំកូរ៉េខាងត្បូងដោយថា “ទង្វើក្បត់ និងចុះចូលរបស់លោក ចំពោះសហរដ្ឋអាមេរិក កំពុងប្រែក្លាយកូរ៉េខាងត្បូងទៅជាឃ្លាំងអាវុធរបស់សហរដ្ឋអាមេរិក និងមូលដ្ឋានជឿនលឿន សម្រាប់សង្គ្រាមនុយក្លេអ៊ែរ និងធ្វើឱ្យប៉ះពាល់ដល់សន្តិសុខនិងផល ប្រយោជន៍មិនត្រឹមតែឧបទ្វីប កូរ៉េប៉ុណ្ណោះទេថែម ទាំងក្នុងតំបន់ផងដែរ “។
កូរ៉េខាងត្បូង និងសហរដ្ឋអាមេរិក បានចេញសេចក្តីថ្លែងការណ៍របស់ទីក្រុងវ៉ាស៊ីនតោន កាលពីថ្ងៃពុធ ដែលបានប្រកាស ពីការបង្កើតក្រុមប្រឹក្សានុយក្លេអ៊ែរថ្មី និងដំណើរទស្សនកិច្ចនាពេលខាងមុខ នៃនាវាមុជទឹកនុយក្លេអ៊ែរបស់ សហរដ្ឋអាមេរិក ទៅកាន់កូរ៉េខាងត្បូង ក្នុងគោលបំណងពង្រឹងអ្វីដែលគេហៅថាការរារាំង៕
ប្រែសម្រួល ឈូក បូរ៉ា
