បរទេស៖ នាយកប្រតិបត្តិ នៃក្រុមហ៊ុនផលិតរថយន្តប្រណីត Mercedes-Benz បានប្រាប់ឱ្យដឹង កាលពីថ្ងៃអាទិត្យថា ការកាត់ទំនាក់ទំនងជាមួយប្រទេសចិន គឺនឹងធ្វើឱ្យឧស្សាហកម្មភាគច្រើន របស់ប្រទេសអាល្លឺម៉ង់ ប្រឈមនឹងហានិភ័យ។
យោងតាមសារព័ត៌មាន RT ចេញផ្សាយ កាលពីថ្ងៃទី១ ខែឧសភា ឆ្នាំ២០២៣ បានឱ្យដឹងថា លោក Ola Kaellenius នាយកប្រតិបត្តិ នៃក្រុមហ៊ុនផលិតរថយន្តប្រណីត Mercedes-Benz ត្រូវបានសម្ភាស ដោយកាសែត Bild am Sonntag បន្ទាប់ពីត្រឡប់ពីដំណើរ ពាណិជ្ជកម្មទៅកាន់ប្រទេសចិន ដែលជាទីផ្សារធំបំផុត និងសំខាន់បំផុត របស់ក្រុមហ៊ុនផលិតអាល្លឺម៉ង់។
មានការព្រួយបារម្ភកាន់តែខ្លាំងឡើងនៅក្នុងប្រទេសអាល្លឺម៉ង់ និងសហភាពអឺរ៉ុប ទាំងមូលអំពីការពឹងផ្អែកសេដ្ឋកិច្ច ក្នុងតំបន់លើប្រទេសចិន ដែលជាដៃគូពាណិជ្ជកម្មឈានមុខគេមួយ និងជាអ្នកផ្គត់ផ្គង់វត្ថុធាតុដើមសំខាន់ សម្រាប់ការផ្លាស់ប្តូរបៃតង។
លោក Kaellenius បាននិយាយថា “តួអង្គសំខាន់នៅក្នុង សេដ្ឋកិច្ចពិភពលោកគឺមាន អឺរ៉ុប សហរដ្ឋអាមេរិក និងចិន ដែលមានទំនាក់ទំនងគ្នា យ៉ាងជិតស្និទ្ធដែលការផ្តាច់ខ្លួន ចេញពីប្រទេសចិន លទ្ធផលគឺគ្មានន័យអ្វីឡើយ” ។ លោកបានបន្ថែមថា «ការផ្តាច់ចេញពីប្រទេសចិនគឺជាការបំភាន់ ជាការរំពឹងដែលមិនសមហេតុផល ហើយក៏មិនគួរឲ្យចង់បាននោះដែរ។
នៅពេលត្រូវបានសួរថាតើវាអាចទៅរួចសម្រាប់ក្រុមហ៊ុន Mercedes-Benz ក្នុងការបញ្ឈប់អាជីវកម្មរបស់ខ្លួននៅក្នុងប្រទេសចិនដែរឬទេ ប្រសិនបើភាពតានតឹងផ្នែកនយោបាយជុំវិញ កោះតៃវ៉ាន់កើនឡើងដូច ដែលបានកើតឡើងជាមួយប្រទេសរុស្ស៊ី បន្ទាប់ពីការចាប់ផ្តើម នៃជម្លោះនៅក្នុងប្រទេស អ៊ុយក្រែននោះ ថៅកែក្រុមហ៊ុន Mercedes-Benz បានឆ្លើយតបថា “នោះជារឿងដែលមិននឹកស្មានដល់សម្រាប់ ស្ទើរតែឧស្សាហកម្មអាល្លឺម៉ង់ទាំងមូល ។
អឺរ៉ុបពឹងផ្អែកលើប្រទេសចិនសម្រាប់ ៩៨ភាគរយ នៃធាតុកម្ររបស់ខ្លួន ដែលត្រូវបានប្រើក្នុងការផលិតថាមពលខ្យល់ ការផ្ទុកអ៊ីដ្រូសែន និងថាមពលថ្ម។ វាក៏ទទួលបាន ៩៧ភាគរយ នៃលោហធាតុលីចូម របស់វាសម្រាប់ផលិត អាគុយពីប្រទេសចិន។ ប្រទេសចិនមានមុខតំណែងលេចធ្លោក្នុងការកែច្នៃរ៉ែកម្រ ដោយមានប្រហែល ៦០ភាគរយ នៃសារធាតុលីចូមរបស់ពិភពលោកចម្រាញ់ នៅក្នុងប្រទេសអាស៊ីខាងកើត។ សហភាពអឺរ៉ុបក៏ទទួលបាន ៨០ភាគរយនៃបន្ទះស្រូបពន្លឺព្រះអាទិត្យ របស់ខ្លួនពីប្រទេសចិនផងដែរ ៕
