កូរ៉េខាងត្បូង និងសហរដ្ឋអាមេរិក នឹងធ្វើសមយុទ្ធបាញ់គ្រាប់ពិតដ៏ធំបំផុត មិនធ្លាប់មាន នៅក្នុងប្រវត្តិសាស្ត្រ របស់ប្រទេសទាំងពីរ

បរទេស៖ ក្រសួងការពារជាតិកូរ៉េខាងត្បូង បានប្រកាសកាលពីថ្ងៃសៅរ៍ថា កូរ៉េខាងត្បូង និងសហរដ្ឋអាមេរិក នឹងធ្វើសមយុទ្ធបាញ់គ្រាប់ពិតដ៏ធំបំផុតមិនធ្លាប់មាន នៅក្នុងប្រវត្តិសាស្ត្ររបស់ប្រទេសទាំងពីរ ក្នុងខួបលើកទី ៧០ នៃសន្ធិសញ្ញាការពារប្រទេសទាំងពីរ។

យោងតាមសារព័ត៌មាន RT ចេញផ្សាយកាលពីថ្ងៃទី៦ ខែឧសភា ឆ្នាំ២០២៣ បានឱ្យដឹងថា សមយុទ្ធដែលនឹងត្រូវធ្វើឡើងចំនួនប្រាំដងចន្លោះពីថ្ងៃទី ២៥ ខែឧសភា ដល់ថ្ងៃទី ១៥ ខែមិថុនា នឹងក្លាយជាប្រភេទធំបំផុតរបស់ពួកគេ ដែលរួមមានយន្តហោះចម្បាំងបំបាំងកាយ F-35A ឧទ្ធម្ភាគចក្រវាយប្រហារ AH-64 Apache រថក្រោះ K2 និងប្រព័ន្ធមីស៊ីល Chunmoo រួមទាំងប្រព័ន្ធអាវុធទំនើបផ្សេងទៀត។

នេះជាសមយុទ្ធបាញ់គ្រាប់ពិតរួមគ្នាលើកដំបូង រវាងប្រទេសទាំងពីរចាប់តាំងពីឆ្នាំ ២០១៧ មក ហើយនឹងធ្វើឡើងនៅទីលានហ្វឹកហាត់ Seungjin Fire Training Field ក្នុងទីក្រុង Pocheon ភាគឦសាននៃទីក្រុងសេអ៊ូល។

សមយុទ្ធយោធានេះនឹងប្រារព្ធខួបលើកទី ៧០នៃសម្ព័ន្ធភាពរវាងទីក្រុងសេអ៊ូល និងទីក្រុងវ៉ាស៊ីនតោន ដែលបានចាប់ផ្តើមរយៈពេល៣ ខែបន្ទាប់ពីបទឈប់បាញ់បញ្ចប់សង្គ្រាមកូរ៉េ នៅពេលដែលប្រទេសទាំងពីរបានចុះហត្ថលេខា លើសន្ធិសញ្ញាការពារជាតិទៅវិញទៅមកក្នុងខែតុលា ឆ្នាំ ១៩៥៣។ សមយុទ្ធនេះក៏ប្រារព្ធខួបលើកទី ៧៥ នៃការបង្កើតរបស់យោធាកូរ៉េខាងត្បូងផងដែរ៕ ប្រែសម្រួលៈ ណៃ តុលា