បរទេស៖ ទីភ្នាក់ងារចិនស៊ិនហួ ចេញផ្សាយនៅថ្ងៃនេះបានឲ្យដឹងថា ប្រទេសអាល្លឺម៉ង់កំពុងបង្ហាញ ជំហរ ក្នុងការបង្កើនការអនុវត្តគោលការណ៍និរទេស ឲ្យបានកាន់តែច្រើនឡើង ចំពោះក្រុមជនភៀសខ្លួន ដែលត្រូវនបានអជ្ញាធរបដិសេធ ហើយផែនការនេះ នឹងត្រូវយកទៅពិភាក្សាជាមួយនឹង រដ្ឋាភិបាលនាថ្ងៃពុធសប្តាហ៍នេះ ហើយ។
យោងតាមកាសែត Bild ដែលបានដកស្រង់ សេចក្តីព្រាងដំណោះស្រាយ ដោយការិយាល័យ លោកអធិការបតី Olaf Scholz បាននិយាយថា ប្រទេសនេះកំពុងស្វែងរកការបង្កើន ប្រសិទ្ធភាព និងអត្រាជោគជ័យ ជាពិសេសក្នុងការធ្វើមាតុភូមិនិវត្តន៍ជនបរទេស ដែលបានប្រព្រឹត្តបទល្មើសព្រហ្មទណ្ឌ របស់អាល្លឺម៉ង់ឲ្យបានកាន់តែច្រើនជាងនេះ ។
ជនបរទេស ដែលបានចូលមកប្រទេសអាល្លឺម៉ង់ ទោះបីជាមានការហាមឃាត់ការចូល គួរតែត្រូវបានដាក់ឱ្យកាន់តែងាយស្រួលនៅក្នុងការឃុំឃាំង ដែលរង់ចាំការនិរទេសត្រឡប់ទៅវិញហើយ លើសពីនេះ ទីតាំងកណ្តាលសម្រាប់ ការរក្សាទុកពួកគេ នឹងត្រូវបង្កើតឡើង ដែលការនិរទេសអាចត្រូវបានអនុវត្តដោយផ្ទាល់។
គួរឲ្យដឹងដែរថាអាល្លឺម៉ង់ បានមើលឃើញចំនួននៃជនអន្តោប្រវេសន៍ ក្នុងឆ្នាំ២០២២កើនឡើង ដល់ចំណុចខ្ពស់បំផុតដែល មានមនុស្សជាង ១,៤ លាននាក់ បានចូលប្រទេសកាលពីឆ្នាំមុន ហើយក្នុងនោះចំនួនអ្នកគ្មានរដ្ឋច្បាស់លាស់ បានកើនឡើងទ្វេដងចាប់តាំងពីឆ្នាំ ២០១៤ រហូតដល់ជាង ២៩ ០០០នាក់ក្នុងឆ្នាំនេះ៕
ប្រែសម្រួល៖ស៊ុនលី
