អ្នកជំនាញ ព្រមានអំពីអាកាសធាតុរដូវក្តៅខ្លាំង នៅវៀតណាម ដែលបង្កើនការព្រួយបារម្ភ អំពីការប្រែប្រួលអាកាសធាតុ

ហាណូយ៖ សារព័ត៌មាន Vietnam News បានរាយការណ៍នៅថ្ងៃអង្គារនេះថា ក្រុមអ្នកវិទ្យាសាស្ត្របានព្រមានថា ការឡើងកំដៅផែនដីកំពុងធ្វើឱ្យលក្ខខណ្ឌអាកាសធាតុអាក្រក់ នៅក្នុងប្រទេសវៀតណាម កាន់តែធ្ងន់ធ្ងរឡើងក្នុងរដូវក្តៅនេះ បន្ទាប់ពីប្រទេសនេះបានជួបប្រទះនឹង កំណត់ត្រាកំដៅ ៤៤,២អង្សាសេ កាលពីចុងសប្តាហ៍មុន។

សីតុណ្ហភាពត្រូវបានវាស់នៅក្នុងផ្ទះនៅស្ថានីយ៍ Tuong Duong ក្នុងខេត្ត Nghe An ភាគកណ្តាលប្រទេសវៀតណាមកាលពីថ្ងៃអាទិត្យមុន។ វាបានឡើងដល់កម្រិតខ្ពស់បំផុត ៤៤,១ អង្សាសេនៅក្នុងខេត្ត Thanh Hoa ភាគខាងជើងមួយថ្ងៃមុននេះ ហើយលើសពីកំណត់ត្រា ៤៣,៤ អង្សាសេនៅក្នុងខែមេសា ឆ្នាំ២ៅ នេះបើយោងតាមមជ្ឈមណ្ឌលជាតិ សម្រាប់ការព្យាករណ៍ឧតុនិយមវារីអគ្គិសនី។

លោក Phan Van Tan អតីតប្រធាននាយកដ្ឋានឧតុនិយមនៃសាកលវិទ្យាល័យវិទ្យាសាស្ត្រហាណូយ បានឲ្យដឹងថា អាកាសធាតុ El Nino ទំនងជានឹងវិវត្តន៍នៅក្នុងខែមិថុនា និងខែកក្កដា ហើយបន្តនៅឆមាសទីពីរនៃឆ្នាំនេះ។

លោកបានបន្ថែមថាក្នុងអំឡុងពេល El Nino ព្យុះត្រូវបានរុញច្រានទៅភាគខាងកើតបន្ថែមទៀត ដែលបង្កើតឱ្យមានសីតុណ្ហភាព ក្នុងមហាសមុទ្រកាន់តែក្តៅ និងមានភ្លៀងធ្លាក់តិចនៅក្នុងដីគោក ជាមួយនឹងតំបន់ភាគកណ្តាលនៃប្រទេសវៀតណាម ដែលរងការវាយប្រហារខ្លាំងបំផុត។

ខណៈពេលដែលអ្នកជំនាញមិនអាចទស្សន៍ទាយពីភាពខ្លាំង និងវិសាលភាពនៃគំរូអាកាសធាតុ El Nino លោកប្រាកដថាសីតុណ្ហភាពជាមធ្យមនឹងខ្ពស់ជាងនៅរដូវក្តៅនេះ។

លោក Le Thi Xuan Lan អតីតអនុប្រធាននាយកដ្ឋានព្យាករណ៍នៃស្ថានីយ៍វារីឧតុនិយមនៃតំបន់ភាគខាងត្បូងបានលើកឡើងថា “ឆ្នាំនេះវាពិតជាមិនធម្មតាខ្លាំងណាស់”៕

ប្រែសម្រួល ឈូក បូរ៉ា