វ្លាឌីស្ដុក ៖ មន្ត្រីម្នាក់បានឲ្យដឹងថា ប្រទេសរុស្ស៊ី នឹងបន្តផ្តល់ការជូនដំណឹង អំពីការបាញ់មីស៊ីលផ្លោងអន្តរទ្វីប (ICBM) និងការបាញ់បង្ហោះដោយនាវាមុជទឹក (SLBM) ក្រោមកិច្ចព្រមព្រៀងឆ្នាំ១៩៨៨ ដែលពាក់ព័ន្ធ ដើម្បីជៀសវាងការ កើនឡើងដ៏គ្រោះថ្នាក់។
អនុរដ្ឋមន្ត្រីការបរទេស លោក Sergey Ryabkov បានឲ្យដឹងថា “យើងពិតជាបានកត់សម្គាល់ពីចេតនារបស់សហរដ្ឋអាមេរិក យ៉ាងហោចណាស់នៅ ក្នុងពាក្យមួយ ដើម្បីបន្តបំពេញកិច្ចព្រមព្រៀងឆ្នាំ១៩៨៨ ស្តីពីការជូនដំណឹងអំពីការបាញ់បង្ហោះ ICBM និង SLBM” ។
លោកបានលើកឡើងថា “យោង តាមក្នុងក្របខ័ណ្ឌនៃ New START (សន្ធិសញ្ញាកាត់បន្ថយអាវុធយុទ្ធសាស្ត្រថ្មី) ការជូនដំណឹងនឹងមិនត្រូវបាន បញ្ជូននោះទេ ប៉ុន្តែនៅក្នុងកិច្ចព្រមព្រៀងឆ្នាំ១៩៨៨ នីតិវិធីពាក់ព័ន្ធនឹងត្រូវបានរក្សាពីខាងយើង”។
សហរដ្ឋអាមេរិក និងអតីតសហភាពសូវៀត បានចុះហត្ថលេខាលើកិច្ចព្រមព្រៀងជូនដំណឹងអំពីការបាញ់មីស៊ីលបាលីស្ទីកក្នុងឆ្នាំ ១៩៨៨ នេះបើយោងតាមកាចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោកបានបន្ថែមថា “ដូច្នេះ កម្រិតជាក់លាក់ នៃតម្លាភាព និងការព្យាករណ៍នឹងនៅតែមាននៅក្នុងតំបន់នេះ ដែលអនុញ្ញាតឱ្យយើងជៀស វាងការកើនឡើងដ៏គ្រោះថ្នាក់បន្ថែមទៀត” ។
ប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្រកាសកាលពីថ្ងៃទី ២១ ខែកុម្ភៈថា ទីក្រុងមូស្គូ នឹងផ្អាកការចូលរួមរបស់ខ្លួននៅក្នុង New START ប៉ុន្តែនឹងមិនដកខ្លួនចេញពីវានោះទេ ក្រោយមក នៅថ្ងៃទី០១ ខែមីនា លោក ពូទីន បានចុះហត្ថលេខាលើច្បាប់មួយ ដើម្បីផ្អាកជាផ្លូវការនូវការ ចូលរួមរបស់រុស្ស៊ីនៅក្នុង សន្ធិសញ្ញា។
លោក Ryabkov បានបន្ដថា “ការសម្រេចចិត្តរបស់យើងក្នុងការផ្អាក New START គឺមិនអាចរង្គោះរង្គើបានឡើយ ដោយមិនគិតពីវិធានការ ឬវិធានការតបតណាមួយពីភាគីអាមេរិក ។ លើសពីនេះ លក្ខខណ្ឌ របស់យើង សម្រាប់ដំណើរការពេញលេញនៃសន្ធិសញ្ញា គឺសហរដ្ឋអាមេរិកបានបោះបង់ចោល នូវគោលនយោបាយអរិភាព ជាមូលដ្ឋានរបស់ខ្លួន ចំពោះប្រទេសរុស្ស៊ី” ។
ក្រសួងការបរទេសសហរដ្ឋអាមេរិក ធ្លាប់បានប្រកាសថា ចាប់ពីថ្ងៃទី០១ ខែមិថុនា ទីក្រុងវ៉ាស៊ីនតោន នឹងបញ្ឈប់ការផ្តល់ទិន្នន័យអំពីស្ថានភាព និងទីតាំងនៃកាំជ្រួច និងឧបករណ៍បាញ់បង្ហោះរបស់ខ្លួន ដែលគ្របដណ្តប់ដោយសន្ធិសញ្ញា New START ៕
