តេអេរ៉ង់៖ ទីភ្នាក់ងារព័ត៌មានផ្លូវការ IRNA បានរាយការណ៍ថា ប្រទេសអ៊ីរ៉ង់ បានបដិសេធថា មិនមានសារធាតុនុយក្លេអ៊ែរ “មិនបានប្រកាស” នៅក្នុងប្រទេសនេះទេ ដែលជាការឆ្លើយតបទៅនឹងសំណួរ ដែលបានលើកឡើងនៅក្នុងរបាយការណ៍ថ្មីៗនេះដោយទីភ្នាក់ងារថាមពលបរមាណូអន្តរជាតិ (IAEA) អំពីសកម្មភាពនុយក្លេអ៊ែររបស់ខ្លួន។
នៅក្នុងរបាយការណ៍មួយរបស់អគ្គនាយក IAEA លោក Rafael Grossi ដែលត្រូវបានបញ្ចប់នៅថ្ងៃទី៣១ ខែឧសភា និងត្រូវបានលាតត្រដាងនៅថ្ងៃទី០៧ ខែមិថុនា លោក Grossi បានលើកឡើងថា IAEA “នៅតែស្វែងរកការពន្យល់ពីទីក្រុងតេអេរ៉ង់ សម្រាប់វត្តមានភាគល្អិតអ៊ុយរ៉ាញ៉ូម នៃប្រភពដើម anthropogenic កំណត់ដោយទីភ្នាក់ងារនៅទីតាំងចំនួន ៣ ដែលមិនបានបញ្ជាក់នៅអ៊ីរ៉ង់
នៅក្នុងរបាយការណ៍របស់លោក លោក Grossi ក៏បានសម្តែងនូវ “ការព្រួយបារម្ភយ៉ាងខ្លាំងដែលថា សារធាតុនុយក្លេអ៊ែរ មានវត្តមាននៅទីតាំង ដែលមិនបានបញ្ជាក់ទាំងនេះ” នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ឆ្លើយតបទៅនឹងរបាយការណ៍របស់ IAEA បេសកកម្មអចិន្ត្រៃយ៍របស់អ៊ីរ៉ង់ ទៅកាន់ការិយាល័យអង្គការសហប្រជាជាតិ និងអង្គការអន្តរជាតិផ្សេងទៀត នៅទីក្រុងហ្សឺណែវ បានឲ្យដឹងនៅក្នុងសេចក្តីថ្លែងការណ៍មួយថា ការចោទសួរអំពីលក្ខណៈនៃកម្មវិធីនុយក្លេអ៊ែរ “សន្តិភាព” របស់អ៊ីរ៉ង់ មិនមានហេតុផលត្រឹមត្រូវនោះទេ ខណៈដែលសកម្មភាពនុយក្លេអ៊ែររបស់ប្រទេសនេះ ស្ថិតនៅក្រោមការត្រួតពិនិត្យរបស់ IAEA ការត្រួតពិនិត្យ និងការផ្ទៀងផ្ទាត់ដោយប្រុងប្រយ័ត្ន។ ប្រភពបានឲ្យដឹងថា ការអះអាងទាំងនេះ គឺផ្អែកលើព័ត៌មាន “ប្រឌិត” ដែលផ្តល់ដោយអ៊ីស្រាអែលជាមួយនឹង “ចេតនាអាក្រក់។
កាលពីខែវិច្ឆិកាឆ្នាំមុន អ៊ីរ៉ង់បានច្រានចោលការអះអាងពីដំណោះស្រាយរបស់ IAEA ដែលស្នើឡើងដោយសហរដ្ឋអាមេរិក អង់គ្លេស បារាំង និងអាល្លឺម៉ង់ថា “ដាននៃសារធាតុអ៊ុយរ៉ាញ៉ូម” ត្រូវបានរកឃើញនៅទីតាំង “មិនបានបញ្ជាក់” មួយចំនួន។
អគ្គនាយក IAEA បានធ្វើទស្សនកិច្ចរយៈពេលពីរថ្ងៃទៅកាន់រដ្ឋធានី តេអេរ៉ង់ របស់អ៊ីរ៉ង់នៅដើមខែមីនា នៅពេលដែលភាគីទាំងពីរ បានយល់ព្រមលើអន្តរកម្មបន្ថែមទៀតដោយផ្អែកលើកិច្ចសហប្រតិបត្តិការរបស់អ៊ីរ៉ង់ និងការបើកចំហកាន់តែខ្លាំង ចំពោះការត្រួតពិនិត្យរបស់ទីភ្នាក់ងារនេះ៕ប្រែសម្រួល ឈូក បូរ៉ា
