ផ្លរីដា៖ អតីតប្រធានាធិបតីអាមេរិក លោក ដូណាល់ ត្រាំ បានសារភាពថា មិនមានកំហុស ចំពោះការចោទប្រកាន់ផ្នែកព្រហ្មទណ្ឌសហព័ន្ធ ដែលចោទប្រកាន់លោកពីបទកាន់ កាប់ឯកសារសន្តិសុខជាតិចាត់ថ្នាក់ បន្ទាប់ពីលោកបានចាកចេញពីសេតវិមាន។
លោក ត្រាំ បានបង្ហាញខ្លួននៅក្នុងតុលាការក្នុងទីក្រុងមៃមី ដោយក្លាយជាអតីតប្រធានាធិបតីអាមេរិកដំបូងគេក្នុងប្រវត្តិសាស្ត្រ ដែលប្រឈមមុខនឹងចៅក្រមលើការចោទប្រកាន់ របស់សហព័ន្ធ ហើយបានចូលសារភាពថា មិនមានទោសចំពោះបទល្មើសព្រហ្មទណ្ឌទាំង ៣៧ករណី។
ចៅក្រម Jonathan Goodman ដែលជាអ្នកត្រួតពិនិត្យសវនាការដំបូងរបស់លោក ត្រាំ មិនបានដាក់កំហិតលើការធ្វើដំណើរលើលោកនោះទេ ប៉ុន្តែបានបញ្ជាឱ្យលោក មិនទាក់ទងដោយផ្ទាល់ជាមួយ សាក្សីណាមួយ អំពីករណីនេះ នេះបើយោងតាមប្រព័ន្ធផ្សព្វផ្សាយធំរបស់សហរដ្ឋអាមេរិក។
ការរាប់ភាគច្រើនទាក់ទងនឹងការរក្សាទុកដោយចេតនានៃកំណត់ត្រារសើបខ្លាំងនៅឯរមណីយដ្ឋាន Mar-a-Lago របស់លោក ក្នុងរដ្ឋផ្លរីដា នៅក្នុងការដឹកនាំរបស់រដ្ឋអាជ្ញាបាននិយាយថា អាចធ្វើឱ្យសន្តិសុខជាតិ និងសម្ព័ន្ធមិត្តរបស់សហរដ្ឋអាមេរិក ស្ថិតក្នុងគ្រោះថ្នាក់។
សវនាការនេះ ធ្វើឡើងចំពេលមានការប្រមូលផ្តុំអ្នកគាំទ្រលោក ត្រាំ នៅក្នុងទីក្រុង និងដោយមានសន្តិសុខតឹងរ៉ឹងជុំវិញ តុលាការនោះ ភាគច្រើនជាទម្លាប់។ ទោះជាយ៉ាងណាក៏ដោយ វាបានទាក់ទាញការចាប់អារម្មណ៍ ជាសាកល ខណៈដែលបច្ចុប្បន្នលោក ត្រាំ គឺជាអ្នកនាំមុខគេក្នុងការបោះឆ្នោតបឋមជ្រើសរើសប្រធានាធិបតីរបស់គណបក្សសាធារណរដ្ឋឆ្នាំ២០២៤។
លោក ត្រាំ បានថ្កោលទោសការចោទប្រកាន់ដោយគណៈវិនិច្ឆ័យធំរបស់សហព័ន្ធថាជា “ការប្រមាញ់មេធ្មប់” ដែលត្រូវបានជំរុញដោយនយោបាយ ហើយលោកគ្រោងនឹងថ្លែងសុន្ទរកថានៅយប់ថ្ងៃអង្គារនៅឯក្លឹបវាយកូនហ្គោលរបស់លោកក្នុងរដ្ឋ New Jersey ។
ការចោទប្រកាន់ ៤៩ ទំព័រប្រឆាំងនឹងលោក ត្រាំ ដែលមិនបិទត្រាកាលពីថ្ងៃសុក្រមាន ៣១ទំព័រដែលទាក់ទងទៅនឹងការរក្សាដោយចេតនានូវព័ត៌មានការពារជាតិ ដែលត្រូវបានចាត់ថ្នាក់ រួមទាំងឯកសារ ដែលមានការចាត់តាំងសម្ងាត់កំពូល បន្ទាប់ពីចាកចេញពីសេតវិមានក្នុងខែមករាឆ្នាំ២០២១៕
ប្រែសម្រួល ឈូក បូរ៉ា
