តេអេរ៉ង់៖ ទីភ្នាក់ងារសារព័ត៌មាន Shana ដែលជាប់ពាក់ព័ន្ធ ជាមួយក្រសួងប្រេងអ៊ីរ៉ង់ បានរាយការណ៍ថា ប្រទេសអ៊ីរ៉ង់ និងវ៉េណេស៊ុយអេឡា បានចុះហត្ថលេខាលើកិច្ចសន្យាមួយចំនួន សម្រាប់កិច្ចសហប្រតិបត្តិការក្នុងវិស័យប្រេងរបាយការណ៍បានឲ្យដឹងថា កិច្ចសន្យាត្រូវបានចុះហត្ថលេខា រវាងរដ្ឋមន្ត្រីប្រេងអ៊ីរ៉ង់លោក Javad Owji និងសមភាគី វេណេស៊ុយអេឡាលោក Pedro Rafael Tellechea នៅទីក្រុងការ៉ាកាស កាលពីថ្ងៃចន្ទ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ប្រភពបានបន្ថែមកិច្ចព្រមព្រៀងទាក់ទងនឹងកិច្ចសហប្រតិបត្តិការក្នុងការអភិវឌ្ឍអណ្តូងប្រេង និងស្ថានីយប្រេង និងការស្ដារឡើងវិញនូវសមត្ថភាពគីមីឥន្ធនៈ និងការចម្រាញ់។
របាយការណ៍បានឲ្យដឹងថា កិច្ចសហប្រតិបត្តិការរវាងអ៊ីរ៉ង់ និងវ៉េណេស៊ុយអេឡា ក្នុងវិស័យប្រេងបានឈានចូលដំណាក់ កាលថ្មីមួយ បន្ទាប់ពីការចុះហត្ថលេខាលើកិច្ចព្រមព្រៀងបឋមមួយ កាលពីឆ្នាំមុនរវាងប្រទេសទាំងពីរ ដើម្បីអភិវឌ្ឍរោងចក្រចម្រាញ់ប្រេង Venezuelan ដោយប្រើចំណេះដឹងបច្ចេកទេស និងឧបករណ៍របស់អ៊ីរ៉ង់។
ទីភ្នាក់ងារសារព័ត៌មាន IRIB របស់អ៊ីរ៉ង់ បានរាយការណ៍ថា លោក Owji បានលើកឡើងថា ប្រទេសអ៊ីរ៉ង់ បាននាំចេញគ្រឿងបន្លាស់ ជាង ២,៨ លានរោងចក្រចម្រាញ់ ទៅកាន់ប្រទេសវេណេស៊ុយអេឡា ក្នុងរយៈពេល ២០ ខែចុងក្រោយនេះ។
លោក Owji បានធ្វើការកត់សម្គាល់នៅក្នុងសុន្ទរកថាទៅកាន់អ្នកសារព័ត៌មាននៅខាងក្រៅដំណើរទស្សនកិច្ចរបស់លោកទៅកាន់រដ្ឋធានីការ៉ាកាស របស់ប្រទេសវេណេស៊ុយអេឡា ក្នុងនាមជាសមាជិកនៃគណៈប្រតិភូនយោបាយ និងសេដ្ឋកិច្ចជាន់ខ្ពស់ ដែលអមដំណើរប្រធានាធិបតីអ៊ីរ៉ង់ Ebrahim Raisi ។
ជាមួយគ្នានេះ អ៊ីរ៉ង់ និងវ៉េណេស៊ុយអេឡា ស្ថិតនៅលើ ៤០ ភាគរយនៃទុនបម្រុងប្រេងរបស់ពិភពលោក នេះបើយោងតាមគេហទំព័រ Shana។ ប្រភពបានឲ្យដឹងថា ឧស្សាហកម្មប្រេងរបស់ប្រទេសទាំងពីរ ស្ថិតនៅក្រោមការដាក់ទណ្ឌកម្មឯកតោភាគីរបស់សហរដ្ឋអាមេរិក។
គេហទំព័រ Shana បានបន្ថែមថា ទោះបីជាមានទណ្ឌកម្មក៏ដោយ ក៏អ៊ីរ៉ង់បានគ្រប់គ្រងការផលិតក្នុងស្រុកចំនួន ៨៥ ភាគរយនៃបរិក្ខារ ដែលត្រូវការសម្រាប់ឧស្សាហកម្មប្រេងរបស់ខ្លួន។ លោក Raisi បានលើកឡើងថា ការមាន “ផលប្រយោជន៍ ទស្សនៈ និងសត្រូវ” រួមបានធ្វើឱ្យទំនាក់ទំនងរវាងទីក្រុង តេអេរ៉ង់ និងទីក្រុងការ៉ាកាស “ស៊ីជម្រៅ និងជាយុទ្ធសាស្ត្រ”៕
ប្រែសម្រួល ឈូក បូរ៉ា
