ប៉េកាំង ៖ អ្នកការទូតកំពូលរបស់ចិន លោក វ៉ាង យី និងរដ្ឋមន្ត្រីការបរទេសអាមេរិក លោក Antony Blinken បានជួបប្រជុំគ្នានៅទីក្រុងប៉េកាំង នៅថ្ងៃចន្ទនេះ ចំពេលមានភាពតានតឹង ទ្វេភាគីកើនឡើងលើបញ្ហាកោះតៃវ៉ាន់ និងបញ្ហាផ្សេងៗទៀត ដោយអ្នកការទូតកំពូល អាមេរិករូបនេះ ទំនងជានឹងជួបមេដឹកនាំចិនលោក ស៊ី ជីនពីង នៅថ្ងៃបន្ទាប់។
លោក Blinken ដែលកំពុងបំពេញទស្សនកិច្ច រយៈពេលពីរថ្ងៃនៅទីក្រុងប៉េកាំង រហូតដល់ថ្ងៃចន្ទនេះ ដោយបានចាប់ដៃជាមួយលោក វ៉ាង យី មុនពេលពួកគេចាប់ផ្តើមការចរចា ដោយបុរសទាំងពីរត្រូវបានគេឃើញក្នុងវីដេអូ ដែលផ្តល់ដោយប្រព័ន្ធផ្សព្វផ្សាយរដ្ឋរបស់ចិន រក្សាការបញ្ចេញមតិតឹងតែងនៅចំពោះមុខកាមេរ៉ា ។
កិច្ចពិភាក្សានេះ បានធ្វើឡើងបន្ទាប់ពីកិច្ចសន្ទនារវាងលោក Blinken និងរដ្ឋមន្ត្រីការបរទេសចិន Qin Gang កាលពីថ្ងៃមុន ដែលមានរយៈពេល ៧ម៉ោងកន្លះ រួមទាំងអាហារពេលល្ងាច សម្រាប់កិច្ចពិភាក្សាការងារផងដែរ ។
ក្នុងអំឡុងពេលកិច្ចប្រជុំកាលពីថ្ងៃអាទិត្យលោក Blinken និងលោក Qin បានយល់ព្រមថា ប្រទេសរបស់ពួកគេនឹងបន្តការសន្ទនា ហើយរដ្ឋមន្ត្រីការបរទេសចិន ត្រូវបានអញ្ជើញឱ្យទៅទីក្រុងវ៉ាស៊ីនតោន ដើម្បីបន្តការពិភាក្សា។
លោក Qin បានពណ៌នាទំនាក់ទំនងចិន-អាមេរិកថាជា “ចំណុចទាបបំផុតចាប់តាំងពីការបង្កើតឡើងមក” ហើយបានសង្កត់ធ្ងន់លើតម្រូវការ សម្រាប់ទីក្រុងប៉េកាំង និងទីក្រុងវ៉ាស៊ីនតោន ធ្វើការដើម្បីស្ថិរភាព និងដឹកនាំទំនាក់ទំនងឱ្យត្រឡប់ទៅរកផ្លូវត្រូវវិញ” ។
លោករដ្ឋមន្ត្រីក៏បានសម្តែងការប្តេជ្ញាចិត្តរបស់ប្រទេសចិនក្នុង “ការកសាងទំនាក់ទំនងស្ថិរភាព អាចព្យាករណ៍បាន និងស្ថាបនា” ជាមួយសហរដ្ឋអាមេរិក នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន។
លើបញ្ហាកោះតៃវ៉ាន់ ដែលក្រុងប៉េកាំងចាត់ទុកថា ជារបស់ខ្លួន លោក Qin បានចង្អុលបង្ហាញថា បញ្ហាទាក់ទងនឹងកោះប្រជាធិបតេយ្យ ដែលគ្រប់គ្រងដោយខ្លួនឯងគឺជា “ផលប្រយោជន៍ស្នូលរបស់ចិន” និង “ហានិភ័យច្បាស់លាស់បំផុត នៅក្នុងទំនាក់ទំនងចិន-អាមេរិក”៕
