ហ្សាកាតា៖ ព្រះចៅអធិរាជជប៉ុន Naruhito និងព្រះអគ្គមហាសី Masako បានថ្វាយផ្កានៅឯទីបញ្ចុះសពវីរបុរស Kalibata ដែលជាកិត្តិយសដល់អ្នក ដែលបានតស៊ូ ដើម្បីឯករាជ្យរបស់ប្រទេសឥណ្ឌូនេស៊ី ក្នុងអំឡុងពេលទស្សនកិច្ចរបស់ពួកគេទៅកាន់ប្រទេសនេះ។
ក្នុងចំណោមអ្នកដែលត្រូវបានបញ្ចុះនៅទីបញ្ចុះសពក្នុងទីក្រុងហ្សាកាតា មានអតីតទាហានជប៉ុនចំនួន ២៨នាក់ ដែលបន្តរស់នៅក្នុងប្រទេសឥណ្ឌូនេស៊ី បន្ទាប់ពីបញ្ចប់ការកាន់កាប់របស់ជប៉ុន និងបានចូលរួមក្នុងការតស៊ូទាមទារឯករាជ្យពីចក្រភពហូឡង់។
ការថ្វាយដង្វាយនេះបានធ្វើឡើងមួយថ្ងៃបន្ទាប់ពីព្រះចៅអធិរាជ និងព្រះអគ្គមហាសី បានជួបជាមួយកូនចៅបួននាក់នៃអតីតទាហានជប៉ុនមួយចំនួន ដែលបន្តរស់នៅក្នុងប្រទេសនេះ។
លោក Heru Santoso Eto ជនជាតិជប៉ុនជំនាន់ទី២ ដែលមានអាយុ ៦៣ឆ្នាំដែលដើរតួជាប្រធាន Yayasan Warga Persahabatan ដែលជាអង្គការដែលបង្កើតឡើងដោយកូនចៅបានសម្តែងការដឹងគុណនៅក្នុងកិច្ចប្រជុំនេះ។ ឪពុករបស់លោលបានស្លាប់នៅឆ្នាំ២០០៣ នៅអាយុ ៨៤ ឆ្នាំហើយត្រូវបានបញ្ចុះនៅ Kalibata ផងដែរ។
យោងតាម YWP ទាហានជប៉ុនប្រហែល ១០០០ នាក់នៅតែតស៊ូ ដើម្បីឯករាជ្យភាពរបស់ឥណ្ឌូនេស៊ី ដែលក្នុងនោះពាក់កណ្តាលបានស្លាប់ ឬបាត់ខ្លួន។ ជប៉ុនបានដាក់ស្លាកសញ្ញាឱ្យពួកគេជាអ្នករត់ចោលជួរ ប៉ុន្តែឥណ្ឌូនេស៊ីបានផ្តល់សញ្ជាតិឥណ្ឌូនេស៊ី និងមេដាយដល់ពួកគេសម្រាប់ការពលីរបស់ពួកគេក្នុងឆ្នាំ១៩៦៥។
លោក Yoga Kusuma Barata អាយុ ២៤ ឆ្នាំបានឲ្យដឹងថាជីតារបស់លោក ឈ្មោះ Kaneo Ueda បានសម្រេចចិត្តស្នាក់នៅប្រទេសឥណ្ឌូនេស៊ី ដោយសារតែលោកបានលង់ស្នេហ៍នឹងស្ត្រីឥណ្ឌូនេស៊ីម្នាក់ ដែលលោលបានរៀបការនៅពេលក្រោយ ហើយលោកត្រូវមានការទទួលខុសត្រូវថ្មី៕ប្រែសម្រួល ឈូក បូរ៉ា
