បរទេស៖ ក្រសួងការពារជាតិអ៊ុយក្រែន បាននិយាយកាលពីថ្ងៃអង្គារថា កងកម្លាំងរបស់ខ្លួនបានបាញ់ ទម្លាក់យន្តហោះគ្មានមនុស្សបើក Shahed ផលិតដោយអ៊ីរ៉ង់ចំនួន ៣២ គ្រឿងក្នុងចំណោម ៣៥ គ្រឿង ដែលរុស្ស៊ីបានប្រើក្នុងការវាយប្រហារ តាមអាកាសដែលបានកំណត់គោលដៅលើទីក្រុងគៀវ និងទីក្រុងផ្សេងទៀតរបស់អ៊ុយក្រែន។
យោងតាមសារព័ត៌មាន VOA ចេញផ្សាយនៅថ្ងៃទី២០ ខែមិថុនា ឆ្នាំ២០២៣ បានឱ្យដឹងថា កងទ័ពអាកាសរបស់អ៊ុយក្រែនបាននិយាយថា ការផ្តោតសំខាន់ជាងគេគឺតំបន់នៃទីក្រុងគៀវ ។
លោក Serhiy Popko ប្រធានរដ្ឋបាលយោធាទីក្រុងគៀវ បាននិយាយនៅលើបណ្តាញ Telegram ថា យន្តហោះគ្មានមនុស្សបើកបានកើតឡើងជាច្រើន ហើយការជូនដំណឹងអំពីការប្រុងប្រយ័ត្ន ផ្នែកដែនអាកាសនៅទីក្រុងគៀវ គឺមានរយៈពេលបីម៉ោង។
មិនទាន់មានសេចក្តីរាយការណ៍ភ្លាមៗ អំពីអ្នកស្លាប់និងរបួសនោះទេ។
នៅតំបន់ Lviv ភាគខាងលិចអ៊ុយក្រែន អភិបាលតំបន់ Maksym Kozytskiy បាននិយាយថា រុស្ស៊ីបានប្រើប្រាស់យន្តហោះគ្មានមនុស្សបើក ដើម្បីវាយប្រហារទីតាំង ហេដ្ឋារចនាសម្ព័ន្ធដ៏សំខាន់មួយ។
មន្ត្រីក្នុងតំបន់ Zaporizhzhia ក៏បានរាយការណ៍ពីការវាយប្រហារ មីស៊ីលរបស់រុស្ស៊ីទៅលើហេដ្ឋារចនាសម្ព័ន្ធ ទូរគមនាគមន៍ និងតំបន់កសិកម្មផងដែរ៕
ប្រែសម្រួលៈ ណៃ តុលា
