តូក្យូ ៖ ប្រទេសជប៉ុន និងសហភាពអឺរ៉ុប បានព្រមព្រៀងគ្នា ដើម្បីពង្រឹងកិច្ចសហប្រតិបត្តិការសន្តិសុខសេដ្ឋកិច្ចឱ្យកាន់តែស៊ីជម្រៅ តាមរយៈការពង្រឹងភាពធន់ នៃខ្សែសង្វាក់ផ្គត់ផ្គង់ សម្រាប់ឧបករណ៍អេឡិចត្រូនិក និងសម្ភារៈសំខាន់ៗផ្សេងទៀត ជាក់ស្តែងផ្ដោតលើប្រទេសចិន និងរុស្ស៊ី។
ក្នុងអំឡុងពេលកិច្ចសន្ទនាកម្រិតខ្ពស់លើកទី៣ របស់ភាគីទាំងពីរលើបញ្ហាសេដ្ឋកិច្ចដូចជាពាណិជ្ជកម្ម និងថាមពល តំណាងជប៉ុន និងសហភាពអឺរ៉ុប ក៏បាននិយាយផងដែរថា ពួកគេនឹងចាត់វិធានការ ដើម្បីទប់ទល់នឹងអ្វីដែលហៅថា ការបង្ខិតបង្ខំសេដ្ឋកិច្ចរបស់ប្រទេសចិន ដែលពាក់ព័ន្ធនឹងការប្រើប្រាស់មធ្យោបាយសេដ្ឋកិច្ច ដើម្បីសម្រេចបាននូវគោលដៅនយោបាយ និងបញ្ចេញឥទ្ធិពលលើផ្សេងទៀត។
ប្រទេសជប៉ុន ត្រូវបានតំណាងនៅក្នុងកិច្ចប្រជុំអនឡាញដោយរដ្ឋមន្ត្រីសេដ្ឋកិច្ច ពាណិជ្ជកម្ម និងឧស្សាហកម្ម Yasutoshi Nishimura និងរដ្ឋមន្ត្រីការបរទេសលោក Yoshimasa Hayashi និងត្រូវបានចូលរួមដោយលោក Valdis Dombrovskis អនុប្រធានប្រតិបត្តិនៃគណៈកម្មការអឺរ៉ុប សម្រាប់សេដ្ឋកិច្ច ដែលធ្វើការដើម្បីប្រជាជន។
ការអំពាវនាវដើម្បីជំរុញបណ្តាញខ្សែសង្វាក់ផ្គត់ផ្គង់កើតឡើងនៅពេលដែលសង្រ្គាម ដែលកំពុងបន្តរបស់រុស្ស៊ីជាមួយអ៊ុយក្រែន ដែលបានចាប់ផ្តើមក្នុងខែកុម្ភៈ ឆ្នាំ២០២២ បន្តបង្កើនភាពមិនប្រាកដប្រជាផ្នែកសេដ្ឋកិច្ច និងភូមិសាស្ត្រនយោបាយ។
លោក Dombrovskis បានឲ្យដឹងក្នុងអំឡុងកិច្ចប្រជុំរបស់ពួកគេថា សហភាពអឺរ៉ុប អាចកាត់បន្ថយផ្នែកខ្លះ នៃសេដ្ឋកិច្ចរបស់ខ្លួនពីប្រទេសរុស្ស៊ី តាមរយៈការដាក់ទណ្ឌកម្ម ដែលត្រូវបានដាក់ជាមួយដៃគូ ដែលមានគំនិតដូចគ្នា ដើម្បីបង្ខូចសមត្ថភាពយោធារបស់ទីក្រុងមូស្គូ និងវាយប្រហារលើចំណុចកណ្ដាល នៃសង្រ្គាមរបស់វិមានក្រឹមឡាំង៕ ប្រែសម្រួល ឈូក បូរ៉ា
