បរទេស ៖ អតីតប្រធានាធិបតីអាមេរិក លោក ដូណាល់ ត្រាំ បានរិះគន់ធ្ងន់ៗ ទៅលើប្រធានាធិបតី Joe Biden និងកូនប្រុសរបស់លោក ជុំវិញការរកឃើញកូកាអ៊ីន នៅក្នុងសេតវិមាន ដោយលើកឡើងថា វាអាចជាកម្មសិទ្ធិរបស់ពួកគេ។
យោងតាមសារព័ត៌មាន RT ចេញផ្សាយនៅថ្ងៃទី៦ ខែកក្កដា ឆ្នាំ២០២៣ បានឱ្យដឹងថា កាលពីថ្ងៃអាទិត្យ ភ្នាក់ងារសេវាសម្ងាត់បានរកឃើញ “កាបូបតូចដែលមានខ្សែរ៉ូត” ដែលមានម្សៅពណ៌ស នៅខាងក្នុងការិយាល័យ West Wing ដែលការរកឃើញនេះ បានជំរុញឱ្យមានការជម្លៀសមនុស្សចេញពីសេតវិមានផងដែរ។ ក្រោយមក មន្ត្រីសេវាសម្ងាត់បានបញ្ជាក់ប្រាប់ CNN ថា ម្សៅនោះពិតជាកូកាអ៊ីន។
ការអត្ថាធិប្បាយលើបញ្ហានេះ លេខាធិការសារព័ត៌មាន របស់សេតវិមានលោកស្រី Karine Jean-Pierre បាននិយាយថា រដ្ឋបាលលោក Biden មានទំនុកចិត្តថាការស៊ើបអង្កេតនឹង “ឈានដល់ចំណុចសំខាន់រកឃើញការពិត” នៃឧប្បត្តិហេតុដោយកត់សម្គាល់ថា សារធាតុត្រូវបានរកឃើញនៅក្នុង “តំបន់ដែលមានការធ្វើដំណើរច្រើន” ដែលតែងតែឃើញភ្ញៀវ ចេញចូលជាច្រើន ។
ទោះបីជាយ៉ាងណាក៏ដោយ អតីតប្រធានាធិបតីអាមេរិក លោក ដូណាល់ ត្រាំ បានផ្តល់ការវាយតម្លៃខុសគ្នាពីឧប្បត្តិហេតុនេះ។
លោក ដូណាល់ ត្រាំ បានសរសេរនៅលើទំព័រ របស់លោកនៅលើ TruthSocial កាលពីថ្ងៃពុធ “តើមានអ្នករាល់គ្នាជឿទេថា កូកាអ៊ីនដែលរកឃើញនៅ West Wing ក្នុងសេតវិមាន នៅជិតការិយាល័យ Oval Office គឺសម្រាប់ប្រើប្រាស់សម្រាប់អ្នកណាផ្សេងទៀតក្រៅពី Hunter & Joe Biden»។
លោក ត្រាំ ក៏បានព្យាករណ៍ទៀតថា “ប្រព័ន្ធផ្សព្វផ្សាយព័ត៌មានក្លែងក្លាយ នឹងចាប់ផ្តើមនិយាយថា បរិមាណដែលបានរកឃើញគឺ “តិចតួចណាស់” ហើយវាពិតជាមិនមែនជាកូកាអ៊ីនទេ” ប៉ុន្តែថ្នាំដែលត្រូវបានគិតថា ដូចជាអាស្ពីរីន ហើយ “រឿងនេះនឹងរលាយបាត់” ៕
ប្រែសម្រួលៈ ណៃ តុលា
