បរទេស៖ សារព័ត៌មាន RIA Novosti បានរាយការណ៍នៅថ្ងៃចន្ទដោយដកស្រង់សម្តីអ្នកនាំពាក្យវិមានក្រឹមឡាំងលោក Dmitry Peskovថា ប្រធានាធិបតីរុស្ស៊ីលោក វ្លាឌីមៀ ពូទីន បានជួបជាមួយតំណាង និងមេបញ្ជាការនៃក្រុមយោធាស៊ីឈ្នួល Wagner កាលពីថ្ងៃទី ២៩ ខែមិថុនា។
យោងតាមទីភ្នាក់ងារព័ត៌មានចិន ស៊ិនហួ ចេញផ្សាយនៅថ្ងៃទី១០ ខែកក្កដា ឆ្នាំ២០២៣ បានឱ្យដឹងដោយយោងតាមលោក Peskov ថា សមាជិករបស់ Wagner សរុបចំនួន ៣៥នាក់ត្រូវបានអញ្ជើញឱ្យចូលរួមក្នុងកិច្ចប្រជុំនេះ រួមទាំងប្រធានក្រុមគឺលោក Yevgeny Prigozhin ផងដែរ។
បើតាម Peskov បាននិយាយទៀតថា ក្នុងអំឡុងពេលកិច្ចជំនួបដែលមានរយៈពេល៣ម៉ោង លោកប្រធានាធិបតី វ្លាឌីមៀ ពូទីន បានវាយតម្លៃការងាររបស់ក្រុម Wagner នៅក្នុងដំណើរការនៃប្រតិបត្តិការយោធាពិសេស ហើយ “បានផ្តល់ការវាយតម្លៃអំពីព្រឹត្តិការណ៍ដែលបានកើតឡើងនៅថ្ងៃទី២៤ ខែមិថុនា” ថែមទៀតផង។
មេដឹកនាំរុស្ស៊ីក៏បានបញ្ជាក់ពីជម្រើសការងារបន្ថែមទៀតសម្រាប់មេបញ្ជាការក្រុមយោធាផងដែរ។
លោកបានកត់សម្គាល់ថា ក្រុមទាហាន Wagner បានបង្ហាញការគាំទ្រយ៉ាងខ្លាំងរបស់ខ្លួនចំពោះមេដឹកនាំរុស្ស៊ី។ សមាជិកក្រុមនេះក៏បាននិយាយដែរថា ពួកគេបានត្រៀមខ្លួនជាស្រេចដើម្បីបន្ត “ការប្រយុទ្ធដើម្បីជាតិមាតុភូមិរបស់ពួកគេ”៕
ប្រែសម្រួលៈ ណៃ តុលា
