បរទេស ៖ ក្រុមមន្ត្រីរបស់រុស្សី កាលពីថ្ងៃអាទិត្យម្សិលមិញ បានឲ្យដឹងថា កងកម្លាំងយោធាអ៊ុយក្រែន បានធ្វើការវាយប្រហារ មកលើមូលដ្ឋានទ័ព របស់រុស្សី ដែលស្ថិតនៅក្នុងទីក្រុង Sevastopol ដែលស្ថិតនៅក្បែរ ទៅនឹងដែនសមុទ្រខ្មៅ ប៉ុន្តែមិនទទួលបាន ជោគជ័យឡើយ ។
យោងតាមការ ចេញផ្សាយ របស់ RT បានឲ្យដឹងថា យន្តហោះដ្រូនមួយ របស់អ៊ុយក្រែនត្រូវបានបាញ់ ទំលាក់ចូលទៅក្នុងទឹក ខណៈដែល៥គ្រឿងទៀត ត្រូវបានបំផ្លាញដោយប្រព័ន្ធរំខាន បែបបច្ចេកវិទ្យា ជាសញ្ញាកាត់ផ្តាច់រ៉ាដា។
គួរឲ្យដឹងដែរថា មូលដ្ឋាន ក៏ដូចជាទីតាំងផ្សេងទៀត របស់កងកម្លាំងយោធារុស្សី នៅតំបន់ Crimea តែងតែរងការវាយប្រហារ បន្ទាប់ពីទីក្រុងមូស្គូ បានចាប់ផ្តើមប្រតិបត្តិការ យោធារបស់ខ្លួននៅអ៊ុយក្រែន ក្នុងខែកុម្ភៈ ឆ្នាំ ២០២២។
កាលពីថ្ងៃទី១៥ ខែមិថុនា កងកម្លាំងការពារដែនអាកាស រុស្សីក៏បានបាញ់ទម្លាក់ ឬកាត់ផ្តាច់ប្រព័ន្ធរ៉ាដា យន្តហោះគ្មានមនុស្ស បើករបស់អ៊ុយក្រែនចំនួន៩គ្រឿង នេះបើយោងតាមអភិបាល ខេត្ត Crimea លោក Sergey Aksyonov៕
ប្រែសម្រួល៖ស៊ុនលី
