បរទេស ៖ អភិបាលក្រុងមូស្គូ ប្រទេសរុស្ស៊ី លោក Sergey Sobyanin បាននិយាយថា មិនមានការខូចខាតអ្វីធំដុំទេ បន្ទាប់ពីមានការប៉ុនប៉ង វាយប្រហារដោយយន្តហោះគ្មាន មនុស្សបើក របស់អ៊ុយក្រែន នៅម៉ោងប្រហែល ៤ ព្រឹកថ្ងៃច័ន្ទ ។ យន្តហោះគ្មានមនុស្ស បើកបានបុកចូលទៅក្នុងអគារ ដែលមិនមែនជាលំនៅដ្ឋាន បន្ទាប់ពីយោធាបានបង្ក្រាប យន្តហោះគ្មានមនុស្សបើកទាំងនោះ ដោយប្រើមធ្យោបាយ សង្គ្រាមអេឡិចត្រូនិច។
យោងតាមសារព័ត៌មាន RT ចេញផ្សាយនៅថ្ងៃទី២៤ ខែកក្កដា ឆ្នាំ ២០២៣ បានឱ្យដឹងថា ក្រសួងការពារជាតិរុស្ស៊ី បាននិយាយ នៅក្នុងសេចក្តីថ្លែងការណ៍ខ្លី មួយថា ខ្លួនបាន រារាំង “ការប៉ុនប៉ង របស់របបទីក្រុងគៀវ ដើម្បីអនុវត្តការវាយប្រហារ ភេរវកម្មដោយប្រើ យន្តហោះគ្មានមនុស្សបើកចំនួនពីរ” នៅព្រឹកថ្ងៃចន្ទ។
ប្រភពមួយនៅក្នុងសេវាសង្គ្រោះបន្ទាន់ បានប្រាប់ទីភ្នាក់ងារព័ត៌មាន TASS ថា បំណែកយន្តហោះគ្មានមនុស្ស បើកជាច្រើនត្រូវបានគេរកឃើញនៅប្រជុំជន Komsomolsky Prospekt នៅកណ្តាលទីក្រុងម៉ូស្គូ ដែលមិនឆ្ងាយពីទីស្នាក់ការធំ របស់ក្រសួងការពារជាតិ ។ នាយកដ្ឋានដឹកជញ្ជូនបាននិយាយថា ចរាចរណ៍នៅតំបន់នេះ ត្រូវបានរឹតបន្តឹងមួយផ្នែក ដោយណែនាំឲ្យប្រជាពលរដ្ឋរកផ្លូវវាង ។
ខណៈដែលយន្តហោះគ្មាន មនុស្សបើកខ្លួនឯងបានបុកអគារដែលមិនមែនជាលំនៅដ្ឋាន បង្អួចជាច្រើននៅក្នុងអគារលំនៅដ្ឋាន នៅក្នុងតំបន់នោះ ត្រូវបានគេរាយការណ៍ថាបានបំផ្ទុះ។ មិនមានរបាយការណ៍អំពីអ្នកស្លាប់ ឬរបួសនោះទេ ប៉ុន្តែសេវាសង្គ្រោះបន្ទាន់កំពុងធ្វើការនៅកន្លែងកើតហេតុ ដោយមានវីដេអូបង្ហាញពីរថយន្តប៉ូលីស និងរថយន្តសង្គ្រោះជាច្រើន។
យន្តហោះគ្មានមនុស្សបើកទីពីរ ទំនងជាបានបុកអគារកម្ពស់ខ្ពស់មួយ នៅភាគខាងត្បូងទីក្រុងមូស្គូ ដែលជាកន្លែងការិយាល័យរបស់ ក្រុមហ៊ុនកែលម្អគេហដ្ឋានដ៏ធំរបស់បារាំង Leroy Merlin ៕
ប្រែសម្រួលៈ ណៃ តុលា
