បរទេស៖ នាយកដ្ឋានកែប្រែ (DoC) របស់ថៃ បានផ្តល់ការធានារបស់ខ្លួនថា សុវត្ថិភាពរបស់អតីតនាយករដ្ឋមន្ត្រីលោក ថាក់ស៊ីន ស៊ីណាវ៉ាត្រា គឺជាអាទិភាពរបស់ខ្លួន នៅពេលដែលគាត់ជាប់ពន្ធនាគារ បន្ទាប់ពីការវិលត្រឡប់ចូលមកប្រទេសថៃវិញ ដូចដែលបានប្រកាសគឺនៅថ្ងៃទី ១០ ខែសីហាខាងមុខ។
យោងតាមសារព័ត៌មាន បាងកក ប៉ុស្តិ៍ របស់ថៃ ចេញផ្សាយនៅថ្ងៃទី២៩ ខែកក្កដា ឆ្នាំ២០២៣ បានឱ្យដឹងថា លោក Ayuth Sintoppant អគ្គនាយកនាយកដ្ឋានកែប្រែ (DoC) បានធ្វើការកត់សម្គាល់បែបនេះកាលពីថ្ងៃសុក្រ ដើម្បីឆ្លើយតបទៅនឹងការអត្ថាធិប្បាយ របស់ឧបនាយករដ្ឋមន្ត្រីចាំផ្ទះ និងរដ្ឋមន្ត្រីក្រសួងយុត្តិធម៌ស្តីទី លោក Wissanu Krea-ngam កាលពីថ្ងៃព្រហស្បតិ៍ដែលថា នៅពេលលោក ថាក់ស៊ីន ត្រលប់មកវិញ លោកនឹងទៅតុលាការដើម្បីទទួលដីកា ដាក់ពន្ធនាគារសម្រាប់សំណុំរឿង ចំនួនបីរបស់លោក ដែលជាលទ្ធផលត្រូវជាប់ពន្ធនាគាររួមគ្នា១០ឆ្នាំ។
លោក Ayuth បាននិយាយថា នាយកដ្ឋាននឹងធានាសុវត្ថិភាពរបស់លោក ថាក់ស៊ីន ហើយនឹងដាក់គាត់ឱ្យនៅដាច់ ពីអ្នកទោសផ្សេងទៀត។
លោកបន្តថា មានអ្នកទោសជាច្រើននៅក្នុងពន្ធនាគារ ដូច្នេះ DoC ព្រួយបារម្ភអំពីសុវត្ថិភាពរបស់លោក ថាក់ស៊ីន ប្រសិនបើគាត់ស្នាក់នៅ ជាមួយអ្នកទោសផ្សេងទៀត។
អគ្គនាយកនាយកដ្ឋានកែប្រែរបស់ថៃរូបនេះ ក៏កំពុងពិចារណាលើការចាត់តាំងមន្ត្រី ជាពិសេសសម្រាប់គាត់ ឬបន្ទប់ឯកជន ដើម្បីការពារគ្រោះថ្នាក់ដែលអាចកើតមាន។ DoC មិនទាន់បានប្រកាសជាផ្លូវការអំពីឈ្មោះ ពន្ធនាគារដែលនឹងត្រូវដាក់លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ដ្រីថៃ នៅឡើយនោះទេ៕
ប្រែសម្រួលៈ ណៃ តុលា
