បរទេស ៖ ការអះអាង របស់លោក Chuwit Kamolvisit ដែលថា អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា បានបោះបង់ចោលផែនការ វិលត្រលប់ចូលប្រទេសថៃវិញ នៅថ្ងៃទី១០ ខែសីហា កំពុងបង្កឱ្យមានភាពចម្រូងចម្រាស់ រវាងកូនស្រីរបស់លោក ថាក់ស៊ីន និងប្រភពសន្តិសុខរបស់ថៃ។
យោងតាមសារព័ត៌មាន The Nation របស់ថៃ ចេញផ្សាយនៅថ្ងៃទី២៩ ខែកក្កដា ឆ្នាំ២០២៣ បានឱ្យដឹងថា លោក Chuwit ដែលបានប្រែក្លាយពីមហាសេដ្ឋី ហាងម៉ាស្សា ទៅជាអ្នកនយោបាយ ហើយបន្ទាប់មកក្លាយជា អ្នកបញ្ចេញព័ត៌មានវិញនោះ បាននិយាយនៅក្នុងហ្វេសប៊ុក នៅថ្ងៃសៅរ៍ថា លោក ថាក់ស៊ីន បានសម្រេចចិត្តរង់ចាំរហូតដល់ “ស្ថានភាពបានផ្លាស់ប្តូរ” មុនពេលគាត់ត្រឡប់ ទៅប្រទេសថៃវិញ។
អ្នកដែលនិយាយរិះគន់មិនសំចៃ មាត់រូបនេះ បានអះអាងថា អតីតនាយករដ្ឋមន្ត្រីបានផ្លាស់ប្តូរចិត្តបន្ទាប់ពីទទួលបាន “ការព្រមានពីគ្រោះថ្នាក់លើសពីការរំពឹងទុក”។
ប៉ុន្តែទោះជាយ៉ាងណាក៏ដោយ កូនស្រីពៅ របស់លោកថាក់ស៊ីន គឺលោកស្រី ផែតងតាន ដែលជាបេក្ខភាព នាយករដ្ឋមន្ត្រីមួយរូប ក្នុងចំណោមបេក្ខភាពនាយករដ្ឋមន្ត្រីទាំងបីរូបរបស់គណបក្សភឿថៃ ហាក់ដូចជាកំពុងងឿងឆ្ងល់ ទៅលើការអះអាងរបស់លោក Chuwit។
ឆ្លើយតបទៅនឹងការបង្ហោះ Facebook របស់តារាល្បីលើការប្រកាសរបស់លោក Chuwit លោកស្រី ផែតងតាន បានសរសេរយ៉ាងសាមញ្ញថា៖ “អត់ប្រយោជន៍”។
នៅថ្ងៃសៅរ៍ ប្រភពពីទីភ្នាក់ងារសន្តិសុខមួយបាននិយាយថា មិនមានការផ្លាស់ប្តូរចំពោះផែនការរបស់លោកថាក់ស៊ីនត្រឡប់ទៅប្រទេសថៃវិញនៅថ្ងៃទី ១០ ខែសីហាទេ ៕
ប្រែសម្រួលៈ ណៃ តុលា
