បរទេស៖ អ៊ុយក្រែនបានប្រើប្រាស់ ទូកគ្មានមនុស្សបើកល្បឿនលឿន វាយប្រហារលើនាវាយោធារុស្ស៊ីមួយទៀត ដែលអមដំណើរនាវាស៊ីវិលនៅសមុទ្រខ្មៅ ។ នេះបើតាមក្រសួងការពារជាតិរុស្ស៊ី បានរាយការណ៍កាលពីថ្ងៃពុធ និងបានកត់សម្គាល់ឧបទ្ទវហេតុបែបនេះ លើកទីពីរក្នុងរយៈពេលជាច្រើនថ្ងៃមកនេះ។
យោងតាមសារព័ត៌មាន RT ចេញផ្សាយនៅថ្ងៃទី២ ខែសីហា ឆ្នាំ២០២៣ បានឱ្យដឹងដោយផ្អែកតាម មន្ត្រីការពារជាតិម្នាក់បានអះអាងថា ឧបទ្ទវហេតុវាយប្រហារនៅពេលយប់ បានកើតឡើងនៅភាគនិរតីនៃសមុទ្រ ប៉ុន្តែបានបញ្ចប់ទៅដោយ បរាជ័យសម្រាប់ទីក្រុងគៀវ ខណៈដែលយោធារុស្ស៊ីបានរកឃើញ និងបំផ្លាញទូកប្រើសម្រាប់វាយប្រហារនោះ។
ក្រសួងការពារជាតិរុស្ស៊ី បានរាយការណ៍ពីការវាយប្រហារ ស្រដៀងគ្នានេះកាលពីថ្ងៃអង្គារ ដោយនិយាយថា វាពាក់ព័ន្ធនឹងទូកគ្មានមនុស្សបើក របស់កងទ័ពជើងទឹកចំនួនបីគ្រឿង ដែលកំណត់គោលដៅ លើនាវាស៊ីវិលរបស់រុស្ស៊ី ដែលកំពុងធ្វើដំណើរឆ្ពោះទៅកាន់ច្រកសមុទ្រ Bosphorus ។ ក្រសួងបានបន្ថែមថា នាវាអមដំណើររបស់ក្បួន បានរារាំងការវាយប្រហារនោះ។
ទីក្រុងគៀវបានបដិសេធការចោទប្រកាន់នេះ ដោយទីប្រឹក្សាប្រធានាធិបតីលោក Mikhail Podoliak បានទទូចថា អ៊ុយក្រែនមិនវាយប្រហារ លើគោលដៅជនស៊ីវិល នោះទេ។
កាលពីខែមុន ការបំផ្ទុះដោយទូកគ្មានមនុស្សបើក របស់កងទ័ពជើងទឹក បានសម្លាប់ជនស៊ីវិលពីរនាក់ ដែលធ្វើដំណើរក្នុងរថយន្តនៅលើស្ពាន Crimean ដែលជាការវាយប្រហារដែលទីក្រុង គៀវ ទាំងអស់ ។ អ្នកនាំពាក្យរបស់ទីភ្នាក់ងារសន្តិសុខ SBU របស់រុស្ស៊ី បានសន្យានៅពេលនោះថា នឹងចេញផ្សាយព័ត៌មានលម្អិតអំពីប្រតិបត្តិការនេះ ៕
ប្រែសម្រួលៈ ណៃ តុលា
