សេអ៊ូល៖ ប្រជាជនកូរ៉េខាងត្បូង សកម្មជន និងអ្នកនេសាទធម្មតារាប់ពាន់នាក់បានប្រមូលផ្តុំគ្នា នៅកណ្តាលទីក្រុងសេអ៊ូល ពីទូទាំងប្រទេស ដើម្បីបង្ហាញពីការប្រឆាំងយ៉ាងម៉ឺងម៉ាត់ របស់ពួកគេចំពោះគម្រោងបញ្ចេញទឹកសំណល់វិទ្យុសកម្ម ដែលគ្រោងទុករបស់ជប៉ុនទៅក្នុងមហាសមុទ្រ។
អ្នកចូលរួមក្នុងការប្រមូលផ្តុំតវ៉ា បានស្រែកពាក្យស្លោកជាឯកច្ឆ័ន្ទ និងកាន់បដាដែលសរសេរថា “ប្រឆាំងដាច់ខាតការបញ្ចេញចោលទឹកសំណល់វិទ្យុសកម្មទៅក្នុងសមុទ្រ និងរក្សាវានៅលើគោក មិនមែនចាក់ចោលក្នុងសមុទ្រនោះទេ”។
លោកស្រី Kim Young-ran អ្នកចូលរួមក្នុងការជួបជុំក្នុងវ័យ ៥០ឆ្នាំបានប្រាប់កាសែតស៊ិនហួថា “គ្មាននរណាម្នាក់ដឹងថា ទឹកសំណល់វិទ្យុសកម្ម នឹងទៅឆ្ងាយប៉ុណ្ណានោះទេ បន្ទាប់ពីវាត្រូវបានបង្ហូរចូលទៅក្នុងមហាសមុទ្រ។ .
លោកស្រី Kim ដែលកំពុងធ្វើការផ្នែកសុខុមាលភាពសង្គម សម្រាប់អ្នកនេសាទនៅទីក្រុងកំពង់ផែ Mokpo ភាគនិរតីបានកត់សម្គាល់ថា អ្នកនេសាទមួយចំនួនបានបញ្ឈប់ការនេសាទរួចហើយនៅក្នុងទីក្រុង ដោយសារតែការព្រួយបារម្ភកាន់តែខ្លាំងឡើងថា ការបញ្ចេញទឹកសំណល់ ដែលមានជាតិនុយក្លេអ៊ែរ គឺជិតមកដល់។
ទោះបីជាមានការរិះគន់យ៉ាងទូលំទូលាយពីក្នុងប្រទេស និងក្រៅប្រទេសក៏ដោយ ក៏រដ្ឋាភិបាលជប៉ុន បាននិងកំពុងជំរុញឱ្យបោះចោលទឹកសំណល់ ដែលមានមេរោគនុយក្លេអ៊ែរនៅរដូវក្តៅនេះ ចេញពីរោងចក្រថាមពលនុយក្លេអ៊ែរ Fukushima Daiichi ដែលរងការវាយប្រហារដោយការរញ្ជួយដីដ៏ធំ និងរលកយក្សស៊ូណាមិនៅក្នុងខែមីនា ឆ្នាំ២០១១៕ ប្រែសម្រួល ឈូក បូរ៉ា
