កាធុម៖ ចាប់តាំងពីការដកទ័ពអាមេរិកចេញពីប្រទេសអាហ្វហ្គានីស្ថានក្នុងខែសីហា ឆ្នាំ២០២១ ភាពមិនប្រាកដប្រជា ដែលប្រឈមមុខដោយជនជាតិអាហ្វហ្គានីស្ថាន ដែលបានធ្វើការឱ្យយោធាសហរដ្ឋអាមេរិក បានកើនឡើងយ៉ាងច្រើន។
រដ្ឋាភិបាលសហរដ្ឋអាមេរិកពីមុនបានសន្យាថា “ជនជាតិអាហ្វហ្គានី ស្ថាន ដែលធ្វើការនៅក្បែរកងកម្លាំងសហរដ្ឋអាមេរិក” នឹងមានផ្ទះនៅសហរដ្ឋអាមេរិក ប៉ុន្តែរបាយការណ៍រដ្ឋាភិបាលជាបន្តបន្ទាប់បានបង្ហាញថា រដ្ឋបាលលោក បៃដិន បរាជ័យក្នុងការផ្តល់ការសន្យានោះ ដោយបន្ថែមថា ការដកទ័ពអាមេរិក ដ៏ច្របូកច្របល់បានធ្វើឱ្យពួកគេមានក្តីសង្ឃឹមតិចតួច សម្រាប់អនាគតនៅក្នុងប្រទេសកំណើតរបស់ពួកគេ។
រយៈពេលពីរឆ្នាំក្រោយមក កម្មវិធីអន្តោប្រវេសន៍របស់សហរដ្ឋអាមេរិក នៅតែជាប់គាំងយ៉ាងធ្ងន់ធ្ងរ។ របាយការណ៍ខែមេសា ពីអគ្គអធិការពិសេសរបស់សហរដ្ឋអាមេរិក សម្រាប់ការកសាងឡើងវិញអាហ្វហ្គានីស្ថាន ដែលជាអ្នកឃ្លាំមើលរដ្ឋាភិបាលឯករាជ្យរបស់សហរដ្ឋអាមេរិក បានឲ្យដឹងថា សហរដ្ឋអាមេរិក “បានចាកចេញពីសម្ព័ន្ធមិត្តភាគច្រើនរបស់ខ្លួន នៅពីក្រោយនោះ”៕ ប្រែសម្រួល ឈូក បូរ៉ា
