តេអេរ៉ង់ ៖ ទីភ្នាក់ងារសារព័ត៌មាន Fars ពាក់កណ្តាលផ្លូវការ របស់អ៊ីរ៉ង់ បានរាយការណ៍ថា ឧទ្ធម្ភាគចក្ររបស់អាមេរិក ជាច្រើនគ្រឿង ត្រូវបានបង្ខំ ឱ្យត្រឡប់ ទៅនាវានៅច្រកសមុទ្រ Hormuz វិញបន្ទាប់ពីទទួលបានការ ព្រមានពីប្រទេសអ៊ីរ៉ង់ នៅក្នុងការជួបគ្នានាពេលថ្មីៗនេះ រវាងភាគីទាំងពីរ បន្ទាប់ពីសហរដ្ឋអាមេរិក បានចាប់ផ្តើមបង្កើតវត្តមានយោធា របស់ខ្លួននៅច្រកសមុទ្រ ។
គេហទំព័រ Fars រាយការណ៍ថា កងនាវាចរនៃកងឆ្មាំ បដិវត្តន៍អ៊ីស្លាម (IRGC) ដែលជាកងកម្លាំងឥស្សរជនរបស់អ៊ីរ៉ង់ បានបញ្ចេញវីដេអូ នៃឧប្បត្តិហេតុកាលពីយប់ថ្ងៃសៅរ៍ នៅឯការប្រមូលផ្តុំ របស់មេបញ្ជាការ IRGC ក្នុងរដ្ឋធានីតេអេរ៉ង់ របស់ប្រទេសអ៊ីរ៉ង់។
នៅក្នុងវីដេអូ ដែលបានកត់ត្រា ការជួបដ៏គ្រោះថ្នាក់ ដែលបានកើតឡើង កាលពីថ្ងៃព្រហស្បតិ៍ កងកម្លាំងទ័ពជើងទឹក IRGC បានព្រមាននាវាចម្បាំង អាមេរិកនៅច្រកសមុទ្រ Hormuz ថាឧទ្ធម្ភាគចក្ររបស់ខ្លួន កំពុងហោះហើរ “ក្នុងតំបន់ជុំវិញ” កប៉ាល់របស់ IRGC និងអណ្តូងប្រេង Hengam របស់អ៊ីរ៉ង់ នៅឯនាយសមុទ្រ និងចូលក្នុងដែនទឹកអ៊ីរ៉ង់ ។
កងកម្លាំង IRGC បានព្រមានថា ពួកគេនឹង “បើកការបាញ់ប្រហារ លើឧទ្ធម្ភាគចក្រ” ប្រសិនបើនាវាចម្បាំងអាមេរិក មិនបានគោរព តាមបញ្ជារបស់ពួកគេ ក្នុងការចុះចតយន្តហោះចម្បាំង និងបញ្ឈប់ពួកគេមិនឱ្យចូល ទៅក្នុងដែនទឹករបស់អ៊ីរ៉ង់ ។
មេបញ្ជាការកងទ័ពជើងទឹក IRGC Alireza Tangsiri ត្រូវបានដកស្រង់សម្តីឲ្យដឹងថា បន្ទាប់ពីបានទទួលការព្រមាន ហើយ IRGC បានបញ្ជូនកប៉ាល់ល្បឿនលឿន របស់ខ្លួន គ្រឿងចក្រ បានចុះចតនៅលើនាវា ។
លោកបានបន្ថែមថា វាជាការចូលលើកដំបូង ដោយជនជាតិអាមេរិក ចូលទៅក្នុងដែនទឹក នៅឆ្នេរសមុទ្រ ភាគខាងត្បូង នៃប្រទេសអ៊ីរ៉ង់ ចាប់តាំងពីខែវិច្ឆិកាឆ្នាំ២០២១ ដោយសង្កត់ធ្ងន់ថា អ៊ីរ៉ង់ និងប្រទេសដទៃទៀត ក្នុងតំបន់អាចធានា បាននូវសន្តិសុខនៅក្នុងដែនទឹក ក្នុងតំបន់ ហើយមិនត្រូវការវត្តមាន របស់ជនបរទេសឡើយ ៕
ប្រែសម្រួល ឈូក បូរ៉ា
