បរទេស៖ក្រសួងការបរទេសរុស្ស៊ី កាលពីថ្ងៃចន្ទម្សិលមិញនេះ បានកោះហៅឯកអគ្គរដ្ឋទូតបារាំងប្រចាំនៅទីក្រុងមូស្គូ លោក Pierre Levy ជុំវិញការប្រព្រឹត្តចំពោះអ្នកកាសែតរុស្ស៊ី នៅក្នុងសន្និសីទសារព័ត៌មាន របស់លោកប្រធានាធិបតី Emmanuel Macron ក្នុងកិច្ចប្រជុំកំពូល G20 កាលពីជាងមួយសប្តាហ៍មុន។
យោងតាមការចេញផ្សាយរបស់ RT ក្រសួងការបរទេសរុស្សីបានអះអាងថា អ្នកឆ្លើយឆ្លងព័ត៌មាន RIA Novosti និងជានិពន្ធនាយកនៅប្រព័ន្ធផ្សព្វផ្សាយ Russia-News ផងនោះ ត្រូវបានបដិសេធការចូលទៅកាន់ព្រឹត្តិការណ៍នេះក្នុង ហើយរុស្សីហៅសកម្មភាពរបស់អាជ្ញាធរបារាំងថាជាការរើសអើងដោយបើកចំហ។
សេចក្តីថ្លែងការណ៍របស់ក្រសួងដដែលបានបន្ថែមទៀតថា សកម្មភាពបែបនេះគឺបានបំពានលើគោលការណ៍សេរីភាពសារព័ត៌មានយ៉ាងដាច់អហង្ការហើយការ ដែលអាជ្ញាធរបារាំងបដិសេធមិនសុំទោសចំពោះឧបទ្ទវហេតុនេះមានន័យថាបារាំងបាន បង្ហាញពីការប្តេជ្ញាចិត្តរបស់ខ្លួនក្នុងការប្រឆាំងនឹង ប្រព័ន្ធផ្សព្វផ្សាយរុស្ស៊ី។
លើសពីនេះរុស្សីបានចាត់ទុកថាវាគឺជាសកម្មភាព ការធ្វើទុក្ខបុកម្នេញអ្នកកាសែតរុស្ស៊ីក្នុងគោលបំណងមួយនៃកិច្ចខិតខំប្រឹងប្រែងជាច្រើនរបស់អាជ្ញាធរបារាំង ក្នុងការទប់ស្កាត់ការមិនពេញតាមរយៈសារព័ត៌មាន។ តាមរយៈឯកអគ្គរដ្ឋទូតបារាំង ទីក្រុងមូស្គូបានទាមទារឱ្យទីក្រុងប៉ារីសបញ្ឈប់ការដាក់សម្ពាធលើប្រព័ន្ធផ្សព្វផ្សាយបែបនេះតទៅទៀត៕
ប្រែសម្រួល៖ស៊ុនលី
