ហាណូយ៖ ប្រភពពីទីភ្នាក់ងារព័ត៌មាន Xinhua បានផ្សព្វផ្សាយនៅថ្ងៃទី២២ ខែកញ្ញា ឆ្នាំ២០២៣ថា កាសែតក្នុងស្រុក VnExpress បានរាយការណ៍ កាលពីថ្ងៃព្រហស្បតិ៍ថា តម្លៃកាហ្វេរបស់វៀតណាម នៅក្នុងទីផ្សារពិភពលោក បានឈានដល់កំណត់ត្រាថ្មីមួយ នៅក្នុងសប្តាហ៍នេះ ។
តម្លៃកាហ្វេ រ៉ូប៊ូស្តា (robusta) បានកើនឡើងដល់កំណត់ត្រា គឺ៦៨.០០០ដុង (រូបិយប័ណ្ណវៀតណាម) ប្រហែល ២.៧៩ដុល្លារអាមេរិកក្នុង១គីឡូក្រាម ដែលតម្លៃនេះបានកើនឡើង៧៦ភាគរយចាប់តាំងពីដើមឆ្នាំនេះ ខណៈដែលតម្លៃកាហ្វេ អារ៉ាប៊ីកា (Arabica) បានកើនឡើងនៅញ៉ូវយ៉កដោយ ពី០,៤៥ដល់០,៩៥សេនក្នុងមួយផោន ដែលមានតម្លៃ១៥៨ដល់១៦២ដុល្លារ ។
ប្រព័ន្ធផ្សព្វផ្សាយក្នុងស្រុកបានរាយការណ៍មកថា ទាំងនេះគឺជាតម្លៃកាហ្វេរបស់វៀតណាមដែលមានតម្លៃខ្ពស់បំផុតក្នុងរយៈពេល៣០ឆ្នាំមកនេះ ។
កាសែត VnExpress បានដកស្រង់សម្តីរបស់លោក Vu Duc Con អនុប្រធានមន្ទីរកសិកម្ម និងអភិវឌ្ឍន៍ជនបទខេត្ត Dak Lak បានលើកឡើងថា មូលហេតុមួយក្នុងចំណោមហេតុផលដែលនាំឱ្យតម្លៃកើនឡើងគឺ ដោយសាររដូវប្រមូលផលមិនទាន់មកដល់ ខណៈដែលស្តុកពីរដូវមុនត្រូវបានលក់អស់ភាគច្រើន ។
លោកបានព្យាករណ៍ថា ក្នុងរយៈពេល២ខែខាងមុខនេះ តម្លៃនឹងអាចសមរម្យវិញ នៅពេលដំណាំកាហ្វេទុំ ។
អគ្គនាយកដ្ឋានគយវៀតណាម បានឲ្យដឹងថា ការនាំចេញកាហ្វេចំនួន៨.០០០តោន ក្នុងរយៈពេល៨ខែដំបូង នៃឆ្នាំនេះដោយទទួលបានប្រាក់ចំណូល ចំនួន៨៥លានដុល្លារ ៕
ដោយ៖ ម៉ៅ បុប្ផាមករា
