បរទេស ៖ យោងតាមការចេញផ្សាយរបស់ RT បានបង្ហាញថា សកម្មភាពពាណិជ្ជកម្ម រវាងរុស្ស៊ី និងចិន បានរក្សាសន្ទុះយ៉ាងលឿន របស់ខ្លួន ចាប់តាំងពីឈាន ដល់កម្រិត កំណត់ត្រា ក្នុងឆ្នាំ ២០២២ហើយ កំពុងបន្តការនាំចេញ និងការនាំចូលមានកំណើន ដ៏រឹងមាំបន្ថែមទៀត ចាប់តាំងពីដើមឆ្នាំ២០២៣។
យោងតាមបណ្តាញ Telegram របស់សេវាកម្មគយរុស្សី ពាណិជ្ជកម្មទ្វេភាគី រវាងប្រទេសទាំងពីរបានកើនឡើង២៥ភាគរយ ចាប់ពីខែមករាដល់ខែសីហា បើប្រៀបធៀបទៅនឹងឆ្នាំមុន ហើយទិន្នន័យពីទីភ្នាក់ងារ គយរបស់ប្រទេសចិន ក៏បានបង្ហាញដែរថា ទំហំពាណិជ្ជកម្មរវាងគ្នា មានចំនួនរហូតទៅដល់ ១៥៥,១ ពាន់លានដុល្លារ ក្នុងអំឡុងពេលនេះ។
គួរឲ្យដឹងដែរថា ប្រទេសរុស្ស៊ី បាននឹងកំពុងផ្គត់ផ្គង់ប្រទេសចិន ភាគច្រើនជាមួយនឹងផលិតផល ថាមពល ដូចជាប្រេង និងឧស្ម័ន ព្រមទាំងផលិតផលចម្រាញ់ កសិ-អាហារ និងផលិតផល ឧស្សាហកម្ម ។
ក្នុងពេលជាមួយគ្នានេះផងដែរ ប្រទេសចិនបាននឹងកំពុងនាំចេញ ទំនិញស្ទើរតែគ្រប់ប្រភេទ រួមទាំងម្ហូបអាហារ បរិក្ខារ ទូរស័ព្ទ គ្រឿងអេឡិចត្រូនិច ផលិតផលវិស្វកម្ម គ្រឿងសង្ហារឹម ប្រដាប់ក្មេងលេង វាយនភ័ណ្ឌ សម្លៀកបំពាក់ និងស្បែកជើង ទៅផ្គង់ផ្គង់ឲ្យរុស្សីវិញដែរ៕
ប្រែសម្រួល៖ស៊ុនលី
