ម៉ូស្គូ៖ ប្រភពពីទីភ្នាក់ងារ Xinhua បានផ្សព្វផ្សាយនៅថ្ងៃទី២៨ ខែកញ្ញា ឆ្នាំ២០២៣ថា លោកស្រី Maria Zakharova អ្នកនាំពាក្យមកពីក្រសួងការបរទេសរុស្ស៊ី បានឲ្យដឹងថា ក្រុងម៉ូស្គូ នឹងតាមដានយ៉ាងយកចិត្តទុកដាក់បំផុតនូវជំហានរបស់សហរដ្ឋអាមេរិក ក្នុងការដាក់ពង្រាយប្រព័ន្ធសព្វាវុធ ដែលពីមុនត្រូវបានហាមឃាត់ដោយ សន្ធិសញ្ញាកងកម្លាំងនុយក្លេអ៊ែរកម្រិតមធ្យម ហៅកាត់ថា (INF) នៅតំបន់អឺរ៉ុប ។
លោកស្រី Zakharova បានលើកឡើងនៅក្នុងអំឡុងពេលធ្វើសន្និសីទសារព័ត៌មានប្រចាំសប្តាហ៍របស់គាត់ថា “យើងកំពុងតាមដានយ៉ាងយកចិត្តទុកដាក់បំផុតនូវរាល់ជំហានរបស់សហរដ្ឋអាមេរិក ដើម្បីអនុវត្តផែនការធ្វើឱ្យមានស្ថិរភាព ដែលពាក់ព័ន្ធនឹងការដាក់ពង្រាយអាវុធទាំងនេះ” ។
លោកស្រីបានធ្វើការកត់សម្គាល់ថា នេះគឺមានសារៈសំខាន់ណាស់ ជាពិសេស ដោយពិចារណាលើការផ្អាករបស់រុស្ស៊ី លើការដាក់ពង្រាយមីស៊ីលដែលបាញ់បានរយៈចម្ងាយមធ្យម និងរយៈចម្ងាយខ្លីជាងនេះ ។
លោកស្រី Zakharova បានលើកឡើងថា “ខ្ញុំចង់រំលឹកអ្នកថា លទ្ធភាពជោគជ័យនៃការផ្អាករបស់រុស្ស៊ី ត្រូវបានភ្ជាប់ដោយផ្ទាល់ទៅនឹងការលេចឡើងនៃ រឿង(ទាំងនេះ) គឺ មីស៊ីលរបស់អាមេរិក … នៅក្នុងតំបន់ដែលពាក់ព័ន្ធ” ។
លោកស្រី Zakharova បញ្ជាក់ទៀតថា ប្រព័ន្ធសព្វាវុធដែលកំពុងពិភាក្សានោះ គឺជាឧបករណ៍បាញ់គ្រាប់ MK-70 ដែលដាក់នៅលើកុងតឺន័រ ។ ប្រព័ន្ធនេះមិនត្រឹមតែប្រើសម្រាប់មីស៊ីល SM-6 ប៉ុណ្ណោះទេ វាថែមទាំងត្រូវបានកែសម្រួល និងអាចប្រើសម្រាប់បាញ់មីស៊ីលរយៈចម្ងាយឆ្ងាយ Tomahawk ផងដែរ ។
លោកស្រីក៏បានលើកឡើងថា ក្រុងវ៉ាស៊ីនតោន បានចាប់ផ្តើមរៀបចំផ្ទេរប្រព័ន្ធមីស៊ីលទាំងនេះ ដែលពីមុនត្រូវបានហាមឃាត់ដោយស្ថិតក្រោមសន្ធិសញ្ញា INF ទៅកាន់តំបន់អឺរ៉ុប ។
តែនៅក្នុងឆ្នាំ២០១៩ សហរដ្ឋអាមេរិក បានប្រកាសជាផ្លូវការអំពីការដកខ្លួនចេញពីសន្ធិសញ្ញា INF នេះវិញ ។
គួរបញ្ជាក់ថា សហរដ្ឋអាមេរិក និងអតីតសហភាពសូវៀត បានចុះហត្ថលេខាលើសន្ធិសញ្ញា INF នៅក្នុងឆ្នាំ១៩៨៧ ដែលហាមប្រាមលើការកាន់កាប់ អភិវឌ្ឍ និងការសាកល្បងមីស៊ីលបាញ់ពីលើដីដែលមានចម្ងាយចាប់ពី៥០០រហូតដល់៥.៥០០ គីឡូម៉ែត្រ ៕ ប្រែសម្រួលដោយ៖ ម៉ៅ បុប្ផាមករា
