បរទេស ៖ យោងតាមការ ចេញផ្សាយ របស់ RT គណៈកម្មាធិការ ស៊ើបអង្កេតរុស្ស៊ី បានកំណត់អត្តសញ្ញាណ មន្ត្រីយោធាជាន់ខ្ពស់ អ៊ុយក្រែន បួននាក់ថាជាមេក្លោង នៃការវាយប្រហារភេរវកម្មជាង ១០០ករណី ដែលពាក់ព័ន្ធនឹងយន្តហោះ គ្មានមនុស្សបើកដែលផ្តោត លើហេដ្ឋារចនាសម្ព័ន្ធស៊ីវិល។
ប្រភពដដែល បានសរសេរថា គណៈកម្មាធិកាបានប្រមូលភស្តុតាង គ្រប់គ្រាន់ ដើម្បីចោទប្រកាន់មេបញ្ជាការទាំងបួនរូប ដែលកំបាំងមុខពីបទឧក្រិដ្ឋកម្ម ទាក់ទងនឹងភេរវកម្ម ហើយមិនត្រឹមតែប៉ុណ្ណោះ ប្រទេសរុស្ស៊ីក៏នឹងស្វែងរកចាប់ខ្លួន ជនសង្ស័យទាំងនោះថែមទៀតផង។
គណៈកម្មាធិការនេះ បានកំណត់ឈ្មោះប្រធានចារកម្ម យោធាអ៊ុយក្រែន លោក Kirill Budanov មេបញ្ជាការកងទ័ពអាកាស និងកងទ័ពជើងទឹកលោក Nikolay Oleshchuk និងលោក Aleksey Neizhapa ក៏ដូចជាមេបញ្ជាការកងវរសេនាធំដ្រូនទី ៣៨៣ នៃកងទ័ពអាកាស លោក Sergey Purdenyuk ផងដែរនៅក្នុងបញ្ជីភេវរកម្ម ។
គួរឲ្យដឹងដែរថា ប្រទេសរុស្សីក៏បានបង្ហាញ នូវបទល្មើសដែលត្រូវបានចោទប្រកាន់ របស់ពួកគេបានកើតឡើង នៅចន្លោះខែមេសា ឆ្នាំ២០២២ដល់ខែកញ្ញា ឆ្នាំ២០២៣ ៕
ប្រែសម្រួល៖ស៊ុនលី
