បរទេស៖ ជនជាតិថៃមានកាំភ្លើងកាន់ផ្ទាល់ខ្លួនប្រហែល ១០,៣ លានដើម ដោយដាក់ប្រទេសថៃឱ្យស្ថិតក្នុងចំណាត់ថ្នាក់ទី ១៣ ទូទាំងពិភពលោកសម្រាប់ការកាន់កាប់កាំភ្លើងធុនតូច, នេះបើយោងតាមរបាយការណ៍ស្ទាបស្ទង់អាវុធធុនតូច (SAS) ដែលមានមូលដ្ឋាននៅប្រទេសស្វីសក្នុងឆ្នាំ ២០១៧ ។
យោងតាមសារព័ត៌មាន បាងកក ប៉ុស្តិ៍ របស់ថៃ ចេញផ្សាយនៅថ្ងៃទី៥ ខែតុលា ឆ្នាំ២០២៣ បានឱ្យដឹងថា តាមការប៉ាន់ស្មានថា ប្រជាជនថៃមានកាំភ្លើងច្រើនជាងគេនៅក្នុងតំបន់អាស៊ីអាគ្នេយ៍ ដោយគិតជាមធ្យម គឺមនុស្ស ១០០នាក់ មានអាវុធ១៥ដើមកាន់។
ក្នុងចំណោមកាំភ្លើង ១០,៣លានដើម ដែលត្រូវបានកត់ត្រាដោយ SAS ក្នុងឆ្នាំ ២០១៧ មានតែប្រហែល ៦,២ លានដើមប៉ុណ្ណោះដែលត្រូវបានចុះបញ្ជីស្របច្បាប់។
ដោយលើកឡើងពីការត្រួតពិនិត្យចំនួនប្រជាជនពិភពលោកក្នុងឆ្នាំ ២០២២ ប្រទេសថៃបានជាប់ចំណាត់ថ្នាក់ទី ១៥ នៃការស្លាប់ដោយកាំភ្លើងជាមួយនឹងមនុស្សចំនួន ២.៨០៤ នាក់ ដោយអាវុធជាមួយនឹងអត្រា ៣,៩១ នាក់ក្នុងចំណោមប្រជាជន ១០០.០០០នាក់ ។
អគ្គស្នងការនគរបាលជាតិថៃ លោកឧត្តមសេនីយ៍ តូសក្តិ ស៊ុកវិមុល បានឆ្លើយតបកាលពីម្សិលមិញថា ប៉ូលិសបានអនុវត្តប្រតិបត្តិការបង្ក្រាបឧក្រិដ្ឋកម្មកាំភ្លើង។ ក្នុងរយៈពេលពីរឆ្នាំកន្លងមកនេះ ប៉ូលិសបានកាត់ទោសជនល្មើសក្នុងករណីជាង ២០០០ ករណី និងរឹបអូសបានកាំភ្លើងជាង ៩០០ ដើម៕ ប្រែសម្រួលៈ ណៃ តុលា
