ម៉ូស្គូ៖ អ៊ីស្រាអែល បានចូលក្នុងស្ថានភាពសង្រ្គាមជាផ្លូវការ ខណៈក្រុមសកម្មប្រយុទ្ធហាម៉ាស ដែលមានមូលដ្ឋាននៅហ្គាហ្សាស្ទ្រីប បានបើកការវាយលុកភ្លាមៗប្រឆាំងនឹងរដ្ឋអ៊ីស្រាអែល។ តើមានអ្វីនៅពីក្រោយការកើនឡើងចុងក្រោយនេះ?
ក្រុមហាម៉ាស បានចាប់ផ្តើមការវាយប្រហារដ៏គួរឱ្យភ្ញាក់ផ្អើលមួយហៅថា ប្រតិបត្តិការទឹកជំនន់ Al-Aqsa នៅម៉ោងប្រហែល ៦ និង ៣០ព្រឹក (GMT+3) នៅថ្ងៃទី០៧ ខែតុលា ដោយបានជ្រៀតចូលទីប្រជុំជនអ៊ីស្រាអែល កំណត់គោលដៅលើទីស្នាក់ការយោធា និងបាញ់រ៉ុក្កែតនៅតំបន់ផ្សេងៗនៃប្រទេស។
ការវាយលុកដោយក្រុមហាម៉ាស ដែលជាក្រុមដែលត្រូវបានចាត់តាំងជាអង្គភាពភេរវករដោយអ៊ីស្រាអែល បានចាប់កងយោធាអ៊ីស្រាអែល ចេញពីការយាមកាម និងបង្ហាញពីការបរាជ័យនៃសេវាចារកម្មរបស់ប្រទេសក្នុងការរារាំងយ៉ាងសកម្មនូវប្រតិបត្តិការដ៏ធំ និងហាក់បីដូចជាបានគ្រោងទុកជាមុន។
ជាការឆ្លើយតបទីក្រុង Tel Aviv បានចាប់ផ្តើមប្រតិបត្តិការ Swords of Iron ។ យោងតាមការប៉ាន់ស្មានខ្លះ អរិភាពបានឆក់យកជីវិតជនជាតិអ៊ីស្រាអែលជាង ៣០០នាក់ និងប៉ាឡេស្ទីន ២៣២ នាក់រួចមកហើយ។
សាស្ត្រាចារ្យ Efraim Inbar ប្រធានវិទ្យាស្ថានយេរ៉ូសាឡឹម សម្រាប់យុទ្ធសាស្ត្រ និងសន្តិសុខបានប្រាប់កាសែត Sputnik ថា “ខ្ញុំគិតថាយើងបានឃើញការបរាជ័យផ្នែកស៊ើបការណ៍ច្បាស់លាស់ ហើយប្រហែលជាវានឹងត្រូវបានស៊ើបអង្កេតបន្ទាប់ពីសង្គ្រាម។ ហើយវាគួរឱ្យភ្ញាក់ផ្អើលយ៉ាងខ្លាំង សម្រាប់អ៊ីស្រាអែល កាលពីម្សិលមិញ” ។
លោក Salamey បានប្រាប់ Sputnik ថា “វាមិនទំនងខ្លាំងទេ ដែលក្រុមហាម៉ាសអាចធ្វើបែបនេះដោយគ្មានជំនួយច្រើនពីខាងក្រៅព្រំដែននៃតំបន់ហ្គាហ្សា ដោយមិននឹកស្មានថា ក្រុមហាម៉ាស អាចធ្វើរឿងបែបនេះបានទេ។ ដូច្នេះ វាពិតជាឆ្លុះបញ្ចាំងពីការបរាជ័យដ៏ធំមួយនៅខាងអាមេរិក និងអ៊ីស្រាអែល ដែលជាសមត្ថភាពវាយតម្លៃស្ថានភាពនៅលើដី”។
ហើយដើម្បីព្យាករណ៍ពីប្រតិបត្តិការយោធា និងទំនើបកម្មបែបនេះ ដូច្នេះវាជាការថយក្រោយដ៏ធំសម្បើម សម្រាប់ CIA និង Mossad និងសមត្ថភាព និងការវាយតម្លៃនៃអ្វី ដែលពួកគេហៅថាសកម្មភាពរបស់អង្គការភេរវករនៅប៉ាឡេស្ទីន និងកន្លែងផ្សេងទៀត”៕
ប្រែសម្រួល ឈូក បូរ៉ា
