កង់បេរ៉ា៖ រដ្ឋាភិបាលអូស្ត្រាលី បានបញ្ជាក់ពីការស្លាប់របស់ពលរដ្ឋម្នាក់ ក្នុងជម្លោះរវាងអ៊ីស្រាអែល និងប៉ាឡេស្ទីន នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
រដ្ឋមន្ត្រីការបរទេស Penny Wong និង Clare O’Neil រដ្ឋមន្ត្រីក្រសួងកិច្ចការផ្ទៃក្នុង បានឲ្យដឹងនៅថ្ងៃពុធនេះថា សាកសពរបស់លោកស្រី Galit Carbone អាយុ ៦៦ឆ្នាំកើតនៅទីក្រុងស៊ីដនី ត្រូវបានរកឃើញចម្ងាយ ប៉ុន្មានម៉ែត្រពីផ្ទះរបស់លោកស្រីនៅ Be’eri kibbutz ដែលមានចម្ងាយប្រហែល ៥គីឡូម៉ែត្រពីព្រំដែនតំបន់ហ្គាហ្សា។
លោក Wong បានឲ្យដឹងនៅក្នុងសេចក្តីថ្លែងការណ៍មួយថា “រដ្ឋាភិបាលអូស្ត្រាលី បានទទួលការបញ្ជាក់អំពីការស្លាប់ ដ៏សោកនាដកម្មនៃស្លាប់របស់លោកស្រី Galit Carbone” ។
យោងតាមទិន្នន័យពីនាយកដ្ឋានកិច្ចការបរទេស និងពាណិជ្ជកម្ម (DFAT) មានពលរដ្ឋអូស្ត្រាលី រហូតដល់ ១២០០០ នាក់រស់នៅក្នុងប្រទេសអ៊ីស្រាអែល។
ថ្លែងតាមទូរទស្សន៍ Seven Network កាលពីថ្ងៃពុធ លោក O’Neil បានឲ្យដឹងថា រដ្ឋាភិបាល កំពុងស្វែងរកជម្រើស សម្រាប់ជើងហោះហើរជួយសង្គ្រោះ សម្រាប់ប្រជាជនអូស្ត្រាលី ដែលចង់ចាកចេញពីតំបន់នេះ ប៉ុន្តែការសម្រេចចិត្តចុងក្រោយនឹងត្រូវធ្វើឡើងដោយលោក Wong និង DFAT ។
លោក Wong បានសរសេរនៅលើប្រព័ន្ធផ្សព្វផ្សាយ សង្គមកាលពីយប់ថ្ងៃអង្គារថា ប្រជាជនអូស្ត្រាលី នៅអ៊ីស្រាអែល មិនគួររង់ចាំជើងហោះហើរធ្វើមាតុភូមិនិវត្តន៍ ដែលដំណើរការដោយរដ្ឋាភិបាលនោះទេ៕
ប្រែសម្រួល ឈូក បូរ៉ា
