តេអេរ៉ង់៖ ប្រធានាធិបតីអ៊ីរ៉ង់ លោក Ebrahim Raisi បានព្រមានអំពីការពង្រីកជម្លោះ ប្រសិនបើអ៊ីស្រាអែលបន្តការវាយប្រហាររបស់ខ្លួនលើតំបន់ហ្គាហ្សាស្ទ្រីប នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោក Raisi បានឲ្យដឹងនៅក្នុងកិច្ចសន្ទនាតាមទូរស័ព្ទជាមួយប្រធានាធិបតីបារាំង Emmanuel Macron ថា “ប្រសិនបើរបប Zionist ស្វែងរកការបង់ប្រាក់ សម្រាប់ការបរាជ័យរបស់ខ្លួនតាមរយៈការបន្តនៃឧក្រិដ្ឋកម្មទាំងនេះប្រឆាំងនឹងប៉ាឡេស្ទីន វិមាត្រនៃការអភិវឌ្ឍន៍សង្គ្រាម នឹងពង្រីក” ។
លោក Raisi បានថ្កោលទោសយ៉ាងខ្លាំងចំពោះការវាយប្រហាររបស់អ៊ីស្រាអែលលើប៉ាឡេស្ទីនក្នុងរយៈពេលប៉ុន្មានថ្ងៃកន្លងមកនេះ និងបានរិះគន់រដ្ឋាភិបាលបារាំង ចំពោះការរារាំងការប្រមូលផ្តុំគ្នាគាំទ្រប្រជាជនប៉ាឡេស្ទីន នេះបើយោងតាមសេចក្តីថ្លែងការណ៍ដែលបានចេញផ្សាយនៅលើគេហទំព័ររបស់ការិយាល័យប្រធានាធិបតីអ៊ីរ៉ង់។
ចំណែកប្រធានាធិបតីបារាំងវិញ បានសម្តែងការព្រួយបារម្ភ ចំពោះការកើនឡើងនៃវិបត្តិនៅតំបន់ហ្គាហ្សាស្ទ្រីប ហើយបានអំពាវនាវឱ្យអ៊ីរ៉ង់ ដើរតួនាទីដ៏មានឥទ្ធិពលរបស់ខ្លួនក្នុងការគ្រប់គ្រងស្ថានការណ៍ក្នុងតំបន់។ ទោះជាយ៉ាងណាក៏ដោយ លោក Raisi បានលើកឡើងថា “ក្រុមតស៊ូអាចសម្រេចចិត្តដោយខ្លួនឯង” ។
ចលនាតស៊ូអ៊ីស្លាមប៉ាឡេស្ទីន (ហាម៉ាស) បានបើកការវាយប្រហារដ៏គួរឱ្យភ្ញាក់ផ្អើលមួយជាមួយនឹងគ្រាប់រ៉ុក្កែតរាប់ពាន់គ្រាប់ និងការជ្រៀតចូលដោយក្រុមសកម្មប្រយុទ្ធជាច្រើននាក់លើអ៊ីស្រាអែលកាលពីថ្ងៃទី០៧ ខែតុលា ដោយជំរុញឱ្យមានការវាយប្រហារតាមអាកាសយ៉ាងទូលំទូលាយរបស់អ៊ីស្រាអែល ទៅលើតំបន់ហ្គាហ្សា៕ ប្រែសម្រួល ឈូក បូរ៉ា
