បរទេស៖ រដ្ឋាភិបាលរបស់ថៃ គ្រោងនឹងជំនួសរថយន្តចាស់ របស់រដ្ឋាភិបាលជាមួយនឹង រថយន្តអគ្គិសនី (EVs) ដើម្បីឆ្លើយតបទៅនឹងគោលដៅជាតិ នៃការសម្រេចបាននូវ អព្យាក្រឹតភាពកាបូននៅឆ្នាំ ២០៥០, នេះបើយោងតាមប្រភពពី វិមានរដ្ឋាភិបាល។
យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី២០ ខែតុលា ឆ្នាំ២០២៣ បានឱ្យដឹងថា ប្រភពបានឱ្យដឹងកាលពីម្សិលមិញថា លោកនាយករដ្ឋមន្ត្រី សេដ្ឋា ថាវីស៊ីន បានចេញលិខិតជូនដំណឹងមួយទាក់ទងនឹងផែនការលើកទឹកចិត្តក្នុងការប្រើប្រាស់រថយន្តអគ្គិសនី (EV) របស់រដ្ឋាភិបាល រួមទាំងវិធានការផ្លាស់ប្តូរយានយន្ត តាមរយៈលេខាធិការដ្ឋាននៃគណៈរដ្ឋមន្ត្រី។
យោងតាមបញ្ជានេះ ក្រសួងហិរញ្ញវត្ថុ និងក្រសួងថាមពល ត្រូវបានគេរំពឹងថា នឹងធ្វើការជាមួយការិយាល័យថវិកា ការិយាល័យក្រុមប្រឹក្សារដ្ឋ និងផ្នែកពាក់ព័ន្ធលើដំណើរការលទ្ធកម្ម EV ដើម្បីផ្លាស់ប្តូរយានយន្តចាស់ៗមួយចំនួនដែលអាយុកាលរថយន្តទាំងនោះនឹងបញ្ចប់ក្នុងរយៈពេលខ្លី។
បទបញ្ជានេះក៏បានរួមបញ្ចូលនូវវិធានការផ្សេងទៀតដែលលើកទឹកចិត្តដល់ការប្រើប្រាស់រថយន្តអគ្គិសនី នៅក្នុងវិស័យសាធារណៈ ទាំងនោះរួមមានការបញ្ជាឱ្យក្រសួងហិរញ្ញវត្ថុ និងក្រសួងដឹកជញ្ជូន បង្កើតមធ្យោបាយដឹកជញ្ជូនសាធារណៈ EV រួមមានរថយន្តក្រុងអគ្គិសនី តាក់ស៊ីអគ្គិសនី និង តុកតុកអគ្គិសនី។
បទបញ្ជាដដែលក៏បានបញ្ជាឱ្យក្រសួងដឹកជញ្ជូន និងថាមពល ធ្វើការជាមួយវិស័យពាក់ព័ន្ធលើការសាងសង់ស្ថានីយ៍សាកអគ្គិសនី ក៏ដូចជាជំនួយផ្សេងទៀតសម្រាប់ហេដ្ឋារចនាសម្ព័ន្ធដែលគាំទ្រការទាមទាររបស់អ្នកប្រើប្រាស់រថយន្តអគ្គិសនីម្នាក់ៗទូទាំងប្រទេស។
ក្រសួងដឹកជញ្ជូនរបស់ថៃត្រូវបានគេរំពឹងថានឹងធ្វើការជាមួយផ្នែកពាក់ព័ន្ធដើម្បីសិក្សា និងបង្កើតវិធានការគាំទ្រសម្រាប់អ្នកប្រើប្រាស់រថយន្តដែលប្រើម៉ាស៊ីនចំហេះខាងក្នុងដែលចង់ផ្លាស់ប្តូររថយន្តរបស់ពួកគេទៅជារថយន្តអគ្គិសនី ដូចជាការចោលយានយន្តដែលអស់អាយុកាលយូរឆ្នាំ និងការកែច្នៃគ្រឿងបន្លាស់ជាដើម។
បទបញ្ជានេះក៏បានឱ្យដឹងទៀតថា រដ្ឋាភិបាលមានផែនការគាំទ្រដល់ខ្សែសង្វាក់ផ្គត់ផ្គង់រថយន្តអគ្គិសនី (EV) ជាពិសេសការវិនិយោគលើការផលិតគ្រឿងបន្លាស់រថយន្តអគ្គិសនីនៅក្នុងប្រទេស ដែលជាផ្នែកនៃគោលនយោបាយលើកទឹកចិត្តយានយន្តគ្មានការបំភាយឧស្ម័ន។ រដ្ឋាភិបាលរបស់ប្រទេសថៃ មានគោលបំណងបង្កើនការផលិតរថយន្តអគ្គិសនីឱ្យបាន៣០%នៅឆ្នាំ២០៣០ និងក្លាយជាមជ្ឈមណ្ឌលរថយន្តអគ្គិសនីក្នុងតំបន់អាស៊ាន៕
ប្រែសម្រួលៈ ណៃ តុលា
