អង់ការ៉ា៖ តួកគី បានរារាំងពិធីសារចូលជាសមាជិកណាតូ របស់ប្រទេសស៊ុយអែត បន្ទាប់ពីមានការពន្យារពេលជាងមួយឆ្នាំ ដែលជាទង្វើមួយ ដែលអ្នកវិភាគបានឲ្យដឹងថា ត្រូវបានជំរុញដោយជម្លោះអ៊ីស្រាអែល និងប៉ាឡេស្ទីន ដែលកំពុងបន្ត និងការខិតខំប្រឹងប្រែងរបស់ទីក្រុងអង់ការ៉ា ដើម្បីទទួលបានកិច្ចព្រមព្រៀងយន្តហោះចម្បាំងជាមួយសហរដ្ឋអាមេរិក។
ប្រធានាធិបតីតួកគីលោក Recep Tayyip Erdogan បានបញ្ជូនពិធីសារនេះទៅសភា ដើម្បីធ្វើសច្ចាប័ននៅថ្ងៃទី២៣ ខែតុលា ដោយគណៈកម្មាធិការទំនាក់ទំនងបរទេសរបស់សភា បានកំណត់ដើម្បីពិនិត្យវាមុនពេលការបោះឆ្នោតចុងក្រោយនៅសភាជាតិ ដែលសម្ព័ន្ធភាពកាន់អំណាចរបស់លោក Erdogan មានសំឡេងភាគច្រើន។
កាលពីខែកក្កដា ក្នុងអំឡុងពេលកិច្ចប្រជុំកំពូលរបស់អង្គការណាតូ នៅទីក្រុងវិលនីញូស៍ ប្រទេសលីទុយអានី លោក Erdogan បានប្តេជ្ញាចិត្តក្នុងការបង្ហាញការដេញថ្លៃសមាជិកភាពរបស់អង្គការណាតូរបស់ស៊ុយអែត ទៅកាន់សភា ប៉ុន្តែមិនមានការរីកចំរើនណាមួយត្រូវបានធ្វើឡើងរហូតមកដល់ពេលថ្មីៗនេះ។
ប្រទេសស៊ុយអែត បានបោះបង់ចោលនូវគោលនយោបាយមិនចូលបក្សសម្ព័ន្ធជាយូរយារណាស់មកហើយ ហើយបានដាក់ពាក្យចូលរួមអង្គការណាតូកាលពីឆ្នាំមុន បន្ទាប់ពីជម្លោះរុស្ស៊ី-អ៊ុយក្រែន។ តួកគី និងហុងគ្រី គឺជាសមាជិកណាតូតែមួយគត់ ដែលមិនទាន់ផ្តល់សច្ចាប័នលើការចូលជាសមាជិករបស់ខ្លួន។
ប្រភពនៅក្នុងសភាដែលនិយាយក្នុងលក្ខខណ្ឌមិនបញ្ចេញឈ្មោះបានប្រាប់ស៊ិនហួថា ពិធីសារអាចត្រូវបានបោះឆ្នោតក្នុងរយៈពេល ១៥ថ្ងៃ “ប្រសិនបើអ្វីៗដំណើរការទៅតាមផែនការ” ប៉ុន្តែបានព្រមានអំពី “ផលវិបាក” ដែលអាចពន្យារពេលការផ្តល់សច្ចាប័ន។
អ្នកវិភាគចង្អុលបង្ហាញថា ជម្លោះនៅតំបន់ហ្គាហ្សា គឺជាកត្តាសំខាន់ក្នុងការសម្រេចចិត្តរបស់លោក Erdogan ក្នុងការជំរុញដំណើរការផ្តល់សច្ចាប័នដោយកត់សម្គាល់ថា មេដឹកនាំតួកគី កំពុងព្យាយាមធ្វើឱ្យមានតុល្យភាពការគាំទ្ររបស់គាត់ចំពោះប៉ាឡេស្ទីន ដែលមានប្រជាប្រិយភាពក្នុងចំណោមមូលដ្ឋានគណបក្សកាន់អំណាចរបស់គាត់ជាមួយនឹងទស្សនៈរបស់រដ្ឋធានីលោកខាងលិចអំពីរដ្ឋាភិបាលរបស់គាត់។
ប្រភពបានឲ្យដឹងថា “លោក Erdogan ចាប់អារម្មណ៍យ៉ាងខ្លាំង ចំពោះតួនាទីជាអ្នកសម្រុះសម្រួលក្នុងជម្លោះ។ រដ្ឋមន្ត្រីការបរទេសអាមេរិកលោក Antony Blinken បានរំលងទីក្រុងអង់ការ៉ា ក្នុងការធ្វើដំណើរនៅមជ្ឈិមបូព៌ានាពេលថ្មីៗនេះ ហើយសហរដ្ឋអាមេរិក បានបង្ហាញពីឆន្ទៈរបស់ខ្លួនក្នុងការចូលរួមជាមួយតួកគី ក្នុងបញ្ហាទាក់ទងនឹងតំបន់ហ្គាហ្សា លុះត្រាតែការចូលជាសមាជិកណាតូរបស់ប្រទេសស៊ុយអែត ត្រូវបានផ្តល់សច្ចាប័ន៕ ប្រែសម្រួល ឈូក បូរ៉ា
